On仔叫參賽者騷腹肌 趕絕「照騙」

（星島日報報道）陳蕾、陳健安（On仔）、馮允謙（Jay）與韋羅莎（Rosa）昨現身《全民造星V》記者會，宣布陳蕾與On仔，以及Jay與Rosa擔任兩組導師。昨日已面試約半百參賽者，稍後更會面試海外參賽者。陳蕾和On仔直言會睇參賽者外型，On仔爆今年多混血兒，雖然未叫他們除衫，但有叫拉高衫騷腹肌，若發現「照騙」會扣分。
陳健安稱有睇前四輯節目，他當時身為觀眾有批評導師的選擇，現在責任落在自己身上就覺得緊張。陳蕾笑言不知如何準備，希望提出精闢意見：「會跟足自己的心畀意見、講真實說話，但又怕剪接後被誤解好mean，所以都有包袱！」On仔表示已和監製花姐開會，會為自己的導師工作定義，希望能好似朋友一樣陪參賽者，將最好一面放大。
陳蕾拒搵MC做人辦
問到如何揀選參賽者？陳蕾自認與On仔睇法相似，欣賞才華外更着重人品，不囂張的會加分，問到可會做惡導師？她笑說：「剛剛見了幾位，覺得自己太善良，畀分較其他人高兩級！要收緊些。」On仔笑說：「剛開始見到乞人憎的會講『麻麻哋』，現在會講『呢個唔得』，好直接！」問陳蕾揀人標準會否參考師弟、《造星II》亞軍張天賦？她笑說：「咁又唔得，搞到標準太高，好大壓力喎！不過見到個別參賽者都有少少MC影子。」陳蕾笑指參賽者好高質，On仔又爆好多人選唱《記憶棉》，更笑言今年多混血兒，觀眾有眼福，兩人直認都會睇外型，若參賽者被發現「照騙」會扣分，On仔笑說：「仲有唔少人都騷上半身！（面試埋上半身？）又無叫除衫，但有叫拉高些衣服睇腹肌。」
Jay表示見過幾位參賽者覺得幾鍾意，最重要是外型舒服，會揀選感覺有更多事物可以發掘和大家分享的人，但他與Rosa都表示現在十分初步，不能貪心個個都想要，笑言有位全能表演者令他們印象深刻，靚仔、肯除衫又是唱《記憶棉》，提到和陳蕾及陳健安的心水相同，Jay笑說：「點解唔唱《反對無效》？首歌我寫一定加分！哈哈！」提到陳蕾與On仔都說參賽者高質令競爭好大，同樣是比賽出身的Jay指自己當年是辭職參賽追夢，若見到參賽者「玩玩吓」便不會揀，因應該尊重比賽和機會，不會只看天賦。他期待分享自己這十年的經驗，笑言不想用惡一面應付學員，但自認高要求，怕自己沒耐性而爆炸，令人期待一向斯文的Jay會否「花姐上身」鬧爆學員！Rosa笑言相信Jay發惡便好大件事，笑指自己也識得惡，但會控制住，對自己有把握。
韋羅莎助爆發小宇宙
提到其他三位導師都是「苦口婆心」路綫，問會否擔心要由Rosa做「黑面」？她笑說：「不會，他們三個都唔少嘢，相信節目中大家會見到他們不同的面貌，剛剛面試都感受到其他人的底綫，都睇得出參賽者的問題。」Jay指Rosa是戲劇老師，對付學生有一套，Rosa自認懂得和學生相處，希望令學生爆發小宇宙。