「社長」AL Chok爆撞倒肥妹難忍笑

（星島日報報道）MIRROR成員盧瀚霆（Anson Lo）與呂爵安（Edan）連日來為劇集《社內相親》開工，繼Edan與沈殷怡拍了一場激吻戲，Anson Lo 與Edan 終於合體，社長與秘書的造型齊齊曝光，這對「登神CP」凌晨時分現身機場進行拍攝，其間更有講有笑，心情大靚。
凌晨一時多，AL先在工作人員及花姐陪同下現身機場，現場有數十「神徒」（粉絲暱稱）守候，AL非常有禮貌地跟他們點頭打招呼，由於神徒太熱情地圍住AL，花姐一度大喝：「企喺度，唔好再行」，AL則全程保持微笑，非常親民。
AL笑點低狂NG
AL到埗後立即埋位，先來拍一場chok爆的戲分，劇情講述飾演社長的AL在停車場落車，並以chok 爆的姿態行過天橋去離境大堂，而在天橋途中他卻不小心撞到一名拎住杯咖啡的花裙美女，搞到對方成杯咖啡掉在地上，不過cool爆的社長就只是輕輕回應了一句便離開，簡單一場戲分、兩take就輕鬆完成，不過估計這個場口是講述社長出現幻覺；接着再拍二幕，雖是同一個劇情，不過今次花裙美女卻變成同一打扮的肥妹仔，可能肥妹仔造型太可愛，笑點低的AL撞埋去的時候，亦幾度忍唔住笑，最後拍了六、七take才完成。此時飾演秘書的Edan隨後拖着行李出場，並代表cool爆的社長向肥妹仔道歉，之後返回AL身旁。
在AL拍攝期間，在旁等候的Edan就機不離手，爭取時間瘋狂打機，而「登神」二人在等埋位其間亦有講有笑，向來是「搞笑擔當」的Edan更經常主動放笑彈，逗得要長期扮cool的AL非常開心，多度忍不住爆笑，互動場面頗搞笑。
開工不忘晒親民
其後上演「登神CP」對手戲，兩子立即入戲變得正經，非常專業，劇情講述兩人出境去旅行，見Edan拖住兩個喼在離境大堂閘口拍攝，AL就全程keep住一個chok樣，更不時做出撥頭髮的招牌動作，加上兩大型男着西裝上陣，相當有型。
大約拍到凌晨4時半，Edan收工先行離開，而AL就要繼續拍餘下在check-in櫃枱的場口，直至凌晨5時終於完成拍攝，眾人在全場工作人員拍手歡呼下收工，臉帶倦意的AL就行到停車場上車離開，途中亦不忘向神徒揮手拜拜，見到記者更非常友善打招呼。