黎明紅館挑戰零死角 大劉甘比恩愛捧場

一連十場《Leon黎明紅館演唱會2023》前晚於紅館舉行首場，名媛甘比（陳凱韻）率先捧場，更與老公劉鑾雄（大劉）恩愛睇騷，大劉日前開記者會為甘比澄清被踢出局謠言，前晚罕有陪太太睇騷追星，更在台下開心玩自拍，笑盈盈心情大靚。

甘比前晚孖老公撐Leon紅館個唱，同行還有眼鏡及鐘表商好友邱子傑與太太邱李茂琪。甘比在社交網開心分享照片，與老公及好友在觀眾席上自拍，大劉坐在甘比身邊展現幸福甜笑。此外，甘比亦上載Leon坐在台上唱快歌的照片，留言：「真係只有Leon可以坐喺度唱快歌，但大家仍然HIGH HIGH HIGH。」
當晚Leon以《孤單的人孤單的我》為演唱會揭開序幕，跟觀眾打招呼時不忘大講金句：「大家好，我哋又喺香港見面，其實一直冇走過。今次舞台改動過好多次，因為要符合規格，整吓整吓我就上咗嚟上面。但大家工餘時間都會成日耷低頭睇手機，𠵱家可以昂高頭向上望吓，今晚返去會瞓得好好！」
複雜程度破紅館紀錄
今次Leon演唱會製作團隊不惜工本，將部分座位封閉設置雷射燈，巨型屏幕的視效再配合龐大的雷射燈設計效果，在結構及製作上的複雜程度，亦打破紅館過往紀錄，為觀眾帶來不一樣的紅館新天空及超震撼的視覺觀感，入場觀眾不論身處哪個角度，均可零死角欣賞到這個完美天幕。除了嶄新視效，演唱會還有不少新元素，Leon演唱《DNA出錯》時，舞蹈員大跳美劇《Wednesday》中爆紅的魔性喪屍舞。選歌方面亦有驚喜，除了幾首甚少在演唱會演唱的舊歌《感應》、《情歸於盡》、《傳情達意》、《情難自控》外，Leon更首次在演唱會唱出《顧家》（同居版）。
完騷前，Leon對台下觀眾說：「我都冇乜嘢好講，好多謝大家來臨，今日星期二，聽日要返工做嘢，多謝晒大家！」他獻唱最後一首歌《我的親愛》，在全場歌迷大合唱熱鬧氣氛下完騷。而當晚除了大劉和太太甘比外，Leon契爺胡楓、寰亞老闆林建岳、商台DJ梁文禮、雲妮、急急子及梁泰來等圈中人亦齊齊捧場。