【阿碌開咪】博彩稅因加必變減

讀過基本經濟學的，必知一個平衡理論，就是很多事物總有個平衡點，拿揑不好，反效果就會出現。

因此最近一睇新民黨對博彩稅建議，我即時感覺：一、黨內冇乜具有經濟學常識黨員；二、黨內沒有投注者（馬或波）；三、完全唔知外圍威力。

因佢哋儍下儍下，竟建議財爺增加博彩稅，認為可以加大庫房收入，真「賴依芙」？

舉個簡單例，若財爺瘋狂加煙酒稅，會點？會令稅收火箭般上升？當然唔會！反之，令走私友開心死，因立時大量新買家湧現，私酒私煙遍地開花，本來唔犯法者，也加入此「肥水」行業，變相引誘本來守法者鋌而走險，罪案勢必急升，執法者頭都大。有冇人天生喜歡犯法？極極極少，但當你提供的誘因太吸引時，等於爆開人性陰暗面！

葉劉淑儀究竟知唔知：一、香港的博彩稅率，是全球最高的？二、新民黨認為大加博彩稅，可令庫房多收數十億元！其實剛剛相反，增加博彩稅，等於趕客，若投注者急降，收入豈能增加？邏輯何在？三、新民黨可知現今外圍賭博有幾洶湧？唔知，搵馬會總裁應家柏傾下，佢係專家，兼掌握非常精準數據！

小弟乃資深馬迷，絕對明白馬迷心態及馬會困境。馬迷人人想守法，但若抽水抽倒離晒譜，正常人都會考慮幫襯本地及海外（用互聯網）外圍，等於直接鼓勵人犯法。

另外，馬會乃全港最大慈善機構，無數社會福利及教育事業依賴佢資助才可生存，同時亦直接、間接提供十萬計就業機會。假若馬會收入驟減，等於無數等待援助者受助機會大減，這是否新民黨所願見發生的呢？政客要靠選票才有議席、才有公權，怎可能「搬起石頭打自己腳」咁蠢？

講完。今午賽事，兩場直路賽形勢簡單，尤其第八場，「連連歡樂」由賀賢馬房拉去畀告東尼接手，試晒閘兼操到嘭嘭聲，再早早「卜」定雷神執韁，熱熱都要捧！二重彩鐵膽也！

曾智華

阿碌開咪