樂●活｜特色糕餅迎甜蜜情人節

話咁快已經年初四，換句話，即係仲有10日時間就係情人節！情人節又點少得為另一半準備甜蜜蜜嘅驚喜！ 

情人節少不了甜入心，又可以打卡曬恩愛嘅蛋糕！A-1 Bakery聯乘GODIVA推出限量版GODIVA瑰麗巧克力蛋糕，有GODIVA巧克力及浪漫的紅寶石巧克力忌廉，濃香細滑又口感柔順綿密，加上鬆軟綿密嘅朱古力海綿蛋糕，兩種不同口味拼湊一起帶出了豐富嘅層次感，且帶有清新嘅香甜。GODIVA瑰麗巧克力蛋糕由今日起（2月4日）於指定分店發售，2月7日於全綫分店發售，仲可以網購店取（按此），夠晒方便。

想要無麩質蛋糕一樣有選擇！LIFETASTIC就準備了心形招牌草莓西瓜蛋糕，心形層式無麩質蛋糕以杏仁餅底製作，層層加入西瓜、玫瑰味忌廉、開心果、玫瑰花瓣、草莓、葡萄，突出不同口感與豐富層次，精緻嘅外形、清新味道，可說是情人節蛋糕嘅健康之選。由即日起至2月6日更有推出早鳥85折優惠。

鍾情有茶香嘅蛋糕，就一定要留意Tea  WG特別加入品牌獨家調配茶嘅蛋糕，好似茶意永恆茶香草莓香草蛋糕，就以杏仁酥餅為底，上蓋綿潤嘅海綿蛋糕，在嵌入草莓醬和檸檬味奶忌廉內餡，外裹茶意永恆茶香慕斯。至於玫瑰芬香紅茶茶香樹莓蛋糕嘅外層就有玫瑰芬香紅茶 茶香慕斯及樹莓醬，與綿潤嘅海綿蛋糕一起品嚐，酸甜交錯，口感豐富。Tea WG亦準備了外脆內軟嘅茶香馬卡龍，馬卡龍以各款獨家調配茶的黑朱古力醬為餡料，茶香混和黑朱古力醬，甜而不膩。

打算趁住情人節同心儀嘅另一半表白的話，可以選擇東海堂嘅戀人告白蛋糕系列，別緻嘅情人節蛋糕盛載住小熊嘅幸福加持，令告白變得更有儀式感。其中嘅白苺‧熊の恋日本白草莓慕絲蛋糕就用咗日本直送產量稀少嘅白草莓，白草莓清甜多汁且香氣撲鼻，夾層內是草莓醬、草莓啫喱、白朱古力脆珠和蛋白蛋糕，外層裹着雲呢拿慕絲，配上可愛雙小熊嘅造型，叫人一見傾心。另外，更有以心形戀愛寶盒為設計的赤苺‧愛の宝箱日本赤莓慕絲蛋糕，紅桑子慕絲蛋糕配上猶如紅寶石般的日本赤莓，單睇外型已散發濃濃愛意，其夾層以藍莓、黑朱古力脆珠、黑森林蛋糕及紅桑子啫喱組合而成，層層砌疊交織的口感如幸福戀愛般的甜絲絲味道。由即日至2月10日或之前訂購白苺‧熊の恋及赤苺‧愛の宝箱兩款蛋糕可享有85折預訂優惠。

另外，皇玥今年首次推出限量版情濃朱古力禮盒，以岩鹽朱古力蛋卷為主角，伴以6款不同精緻造型嘅朱古力。岩鹽朱古力蛋卷用上純天然黑朱古力磚融進蛋卷，以60%的純天然朱古力比例，製作成帶有朱古力香甜味道，而不帶苦澀味的蛋卷，更在蛋卷面層撒上獨具風味嘅喜馬拉雅山岩鹽，輕咬一口，恍如品嚐一顆入口即融的朱古力塊，而同時又酥脆可口的朱古力。至於6款不同造型的朱古力就以最上乘的瑞士朱古力及精選果仁炮製而成，包括杏仁黑朱古力、堅果黑朱古力、開心果杏仁軟糖朱古力、杏仁朱古力、榛子朱古力、可可粒果仁朱古力，香濃幼滑，口感豐富，層次分明，果仁味道濃郁。想特別啲，仲可以入手情濃朱古力配皇玥小兔禮盒 ，以粉紅色為主調嘅禮盒，伴隨2隻皇玥小兔互相倚偎，為一半更添浪漫氣氛。

想再特別的，可以加送皇玥唐果子系列，色彩豐富繽紛嘅唐果子融入現代食材，以牛油、雞蛋、麵粉、蓮子等不同食材，以全人手搓皮包餡，慢火烘焗製成。唐果子玉瓏禮盒內有柚子唐果子及草莓唐果子，其中柚子唐果子嚴選韓國新鮮柚子，配合檸檬、蜂蜜等食材，炮製出秘製柚子餡料，果香清新，酸甜可口；草莓唐果子餡料加入鮮製的草莓乾，帶出香濃的草莓香味。

作者：Laurie Wu（愛保健愛旅遊愛購物的熟女）

[email protected]