阿碌開咪｜救救垂死栢麗大道

地運呢吓野，真的不以個人意志為依歸，兼且好難單憑人為策劃可以扭轉，必須天時、地利、人和，再加風水布局，才可能略略營造出變化。

上世紀八十年代，小弟一家在尖沙嘴加連威老道開四川菜館，本來諗法及觀察，此區屬舊區，商鋪林立，行人如鯽，不少更屬花得起錢，又喜愛Hot & Spicy Food的外國人，理應必掂。

點知開業不久，剛剛食正地運大轉移。其時尖東冒起，N咁多家新酒店開幕，扯走晒遊客外，更甚當年香港經濟大旺，紙醉金迷生活極盛，日本及內地豪客來港做生意（大部分在燒錢地方傾），本地商人當然出手闊綽，晚晚鋸完鮑魚，就去中國城或大富豪一類銷金窩，在美女美酒交織下握手簽約。

銷金窩，間間十萬方呎計，當然不能設在尖沙嘴舊區，太逼夾也。於是，財運統統走晒過尖東。當然，黑社會也在那區雲集，搞出多宗劈友事件，震動治安高層。

當年有條新開大道亦食正地運，正是栢麗購物大道。名字具品味，設計新穎，不少遊客慕名參觀，生意旺到不得了，租金當然升上太空。

不過，又係地運一轉，就似尖東今日，拍晒烏蠅，租金急降都冇人吼。

最近新聞報道，栢麗購物大道最新租出的鋪，只方呎租七十七元，比上一張約急跌三十四巴仙。

絕非意料之外！大家只要到現場走走便知，冷冷清清，有人肯租都已經偷笑。

點搞？小弟有個想法，不過，可能冇人騷。就是將成條栢麗大道拆卸（反正只得兩層高，浪費空間），由具實力財團（最好是美麗華集團）購入，改建一級商廈及酒店。基於景觀有九龍公園，必定搶爆。然後興建一條天橋跨越彌敦道，直插入美麗華商場，將後者旺氣吸收。

如此必可令栢麗大道翻生，兼且新建築物也會賺大錢。這個轉地運大法，大家認為行得通嗎？我拍拍拍心口，肯定掂過碌蔗！冇理由睇住個靚位無情情死直㗎喎！

曾智華

阿碌開咪