阿碌開咪｜「拉客」大震撼

周三早上揭本報新聞版，揭呀揭，揭到A4，大條標題鎖住眼球：《縮班在前，教師儼如地產經紀「拉客」，學童人數續下跌，黃大仙將軍澳中學重災》。

用「拉客」來形容教師，真是情何以堪？

世事出現，總有因有果。當年輕夫婦傾向少生BB，再加上近兩年移民家庭急升，不少是有中小學年紀子女的，自然本港學生人數立即急降。

點搞？政府對策，就是轉校、合併及重置。名校當然唔使驚，但三、四綫中學就危矣。為求自保，慘情，斯斯文文老師竟要變地產經紀，紛紛湧往觀塘宏利金融中心教育局學位分配組門外，搶得幾多就搶幾多（學生）！幸而並未發生如「美記」及「中記」地產經紀大戰場面，算係咁嘞。

小弟對於「拉客」兩個字，有少少反感，因曾有過震撼性經驗，非常不快。

其實「拉客」並非中性詞，而是帶有負面的。提供服務或商品，永遠講供求。優質的，自然有客求，使乜「拉」？搞低檔次？

我的震撼性經驗，發生在一九七三年聖誕。當時就讀羅富國教育學院（經已蒸發！），隨學聯大專團到台北旅遊。其中一晚，導遊帶往當地的著名紅燈區——華西街。其時，台北黃色事業極氾濫（一如上世紀九十年代後的東莞），經濟情況普通，令大量婦女需從事性工作維生。

一到晚上，華西街街頭百計妓女爭生意，其中一招，正是「拉客」，真真正正的出手「拉」。

當時小弟未見過這種場面，也不知道該處妓女「拉客」的絕招，正是——快手搶去你的眼鏡就往街尾跑。當然，佢並非對你膠框眼鏡有興趣，而是引你上妓寨幫襯也。

設想，當你完全沒有尋花問柳經驗，也不知道這行的運作情況，就畀一個濃妝艷抹的豪邁女性搶去眼鏡，會有何反應？

當然大震撼！結果有冇幫襯？當然冇！

咁點甩身呢？好好，佢無非為錢咁搞啫，一於當我行衰運。結果放低一百新台幣，安然逃離困境。

 

曾智華

阿碌開咪