阿碌開咪｜趁戰亂，撳住搶

世事混亂，各國按自己利益立場行事，對外講的一切，當然又是——我啱晒，佢錯晒。

此乃正常現象，但不代表這就是真理！

各國愈多利益分歧，一切就愈歸邊，正如多年前小布殊名言：Either you are with me or with the terroists。當時我一聽已覺呢丁友太過強權霸道，一係企你邊，一係我就變咗同恐怖分子成為一夥？道理何在？真係嗤之以鼻。

不過，現今世界仍是個森林，當然行森林法則，弱肉強食。與文明未開前的荒蠻世界，相差不遠，只不過如今大家着西裝、打晒領呔矣。

世界愈歸邊，就愈需要有中立人士企出來執行公義。邊個擔當此角色？理所當然是聯合國。雖然真正力量年比年弱，但起碼發聲好過唔發聲。

聯合國秘書長古特雷斯，正正有責任仗義執言。就算不能逼任何國家或大集團履行公義，但起碼公開指出並譴責，在仍有少少「人要面樹要皮」的國際舞台上，會產生丁點壓力，好過變啞佬！

其中一樣必須由古特雷斯提出的，正是國際大油魔「趁戰亂，撳住搶」！

俄軍入侵烏克蘭導致舉世能源供應緊張，價格飛升，能源公司大發「戰爭財」，真係肥到着唔到襪，獲得破紀錄盈利。其中四家最大能源企業——埃克森美孚、雪佛龍、蜆殼及道達爾，最新一季合共賺取咗五百一十億美元，比去年同期暴增兩倍！

其實石油大集團背後，不少與政府有千絲萬縷關係，所以，大量利益集團在幕後參與操弄，上下其手，希望趁亂賺盡。

古特雷斯持有的密料，當然遠比普通人多，故力斥巨無霸油企及其金融支持者「醜惡貪婪」（Grotesque Greed），榨乾最貧窮的民眾及社群。佢大力呼籲各地政府理應徵收「油魔」暴利稅，再用來支援無助的弱勢社群。小弟百分百舉腳支持，且看最終可有滿口仁義道德的政府，真正落實行動嘞。

曾智華

 

阿碌開咪