阿碌開咪｜周末預備大量散銀

社會，一定要恢復常態的，我哋絕不能因一個疫情而無限期停擺。

最荒謬，外邊世界（內地另計）全部經已通晒關，恢復疫前狀態，但香港人仍窒住窒住。結果如何？當然畀人「搶野呀」！搶晒資金、人才及遊客啦。點解人哋得，我哋唔得？要等到幾時？

幸而近日已一樣又一樣活動恢復，隔離期縮短，外地移民回港探親、旅遊、辦公事人數飆升。我最關心的慈善活動，也可一項又一項進行了。

過去三年，行行苦不堪言。其中之一，正為慈善事業。點解？簡單，街都唔畀出，點搞活動籌款？須知社會服務係冇得停嘅，意即各大機構照顧開嘅老弱傷殘，絕對不可以話冇錢而停擺。咁點？首先食老本，將儲備拿出來頂住先，但這絕非長遠之計。最後，點都要開始返恆常的籌款活動，例如賣獎券、賣旗、搞晚會等等。

正常日子，周三、周六各大機構輪流賣旗，乃一項年度不錯的收入。

之外，更有一個重大意義，為培養幼稚園中小學生及各年紀義工點點關懷社會之心。

過去幾十年，小弟有個習慣，凡周六出外早餐，會先到相熟報攤換一大堆兩蚊銀。早餐完，通常九點多，見到街頭街尾、屋村入口、港鐵站口，紛紛企滿賣旗的老中青義工。正！每個都「幫襯」，兩蚊雞一個，入落福袋之後，就會見到一臉可愛的笑容，收到一句衷心的感謝，又或福有攸歸。

老友，我只區區付出幾十蚊，就換來幾十張笑臉、幾十句多謝，幫到幾十個義工，你話嘞，幾咁大快樂？

不過，前年開始，弊！疫情一殺到，人與人之間立即被逼疏離，陌生人再不可接近。自然，一切人群聚集的慈善活動全部取消，冇晒。

結果，機構大擔心，義工大失落，作為善長，我亦大大冇癮。

不過，近日復常嘞。上周六經過黃埔花園，見到多個家長拖住讀幼稚園的子女，替「防止虐待動物協會」賣旗。嘩，正！速速去換硬幣，今次，升呢到五蚊雞嘞！

曾智華

 

阿碌開咪