阿碌开咪｜周末预备大量散银

社会，一定要恢复常态的，我哋绝不能因一个疫情而无限期停摆。

最荒谬，外边世界（内地另计）全部经已通晒关，恢复疫前状态，但香港人仍窒住窒住。结果如何？当然畀人「抢野呀」！抢晒资金、人才及游客啦。点解人哋得，我哋唔得？要等到几时？

幸而近日已一样又一样活动恢复，隔离期缩短，外地移民回港探亲、旅游、办公事人数飙升。我最关心的慈善活动，也可一项又一项进行了。

过去三年，行行苦不堪言。其中之一，正为慈善事业。点解？简单，街都唔畀出，点搞活动筹款？须知社会服务系冇得停嘅，意即各大机构照顾开嘅老弱伤残，绝对不可以话冇钱而停摆。咁点？首先食老本，将储备拿出来顶住先，但这绝非长远之计。最后，点都要开始返恒常的筹款活动，例如卖奖券、卖旗、搞晚会等等。

正常日子，周三、周六各大机构轮流卖旗，乃一项年度不错的收入。

之外，更有一个重大意义，为培养幼稚园中小学生及各年纪义工点点关怀社会之心。

过去几十年，小弟有个习惯，凡周六出外早餐，会先到相熟报摊换一大堆两蚊银。早餐完，通常九点多，见到街头街尾、屋村入口、港铁站口，纷纷企满卖旗的老中青义工。正！每个都「帮衬」，两蚊鸡一个，入落福袋之后，就会见到一脸可爱的笑容，收到一句衷心的感谢，又或福有攸归。

老友，我只区区付出几十蚊，就换来几十张笑脸、几十句多谢，帮到几十个义工，你话嘞，几咁大快乐？

不过，前年开始，弊！疫情一杀到，人与人之间立即被逼疏离，陌生人再不可接近。自然，一切人群聚集的慈善活动全部取消，冇晒。

结果，机构大担心，义工大失落，作为善长，我亦大大冇瘾。

不过，近日复常嘞。上周六经过黄埔花园，见到多个家长拖住读幼稚园的子女，替「防止虐待动物协会」卖旗。哗，正！速速去换硬币，今次，升呢到五蚊鸡嘞！

曾智华

 

阿碌开咪