阿碌開咪｜擔凳仔睇辯論

上周《星島》國際版頭條，小弟一睇，先窒一窒，繼而心中暗笑，因標題為：《星洲邀布蘭森辯論毒品死刑》。

背景是新加坡4月處決一名2009年走私44克海洛英入獅城的馬來西亞毒販，此事震動聯合國及歐盟，認為判刑太過嚴重。

此時，英國維珍航空大老闆布蘭森（Richard Branson）趁10月10日「世界反對死刑日」，高調公開抨擊新加坡，不但濫判一個「患有智力障礙者」死刑，兼且力指這國家針對毒品的判刑及將毒販判死刑，是「站在歷史錯誤」的一邊！

當中令新加坡最馨的一句，為指此國近月意氣風發，經濟實力急升之際，同期執行死刑的頻率也日益急升，實屬新加坡聲譽的污點！嘩！好重口喎。星政府覺得自己聲譽日隆，國際地位日高，你竟來「潑紅油」？

本來若布蘭森為Nobody，星政府真係睬佢都儍。問題在佢身分顯赫，所有言論西方媒體都引述。如今再加埋歐盟及聯合國都出埋聲，呢鋪點下台呢？有損國家形象喎。

終於星政府出手了，但我睇，真係蠢過隻豬。因竟公開挑戰布蘭森「隻揪」，上電視直播辯論，睇睇究竟邊個更有道理。

其律政部長尚穆根更上晒頭「大」老布，公開揶揄：「新加坡畀埋來回機票及酒店你到此與我辯論！睇睇你又點可以證明我哋做法是錯的，唔該順便解釋一下為乜新加坡要廢除令人民深受痛苦的毒品法例？夠薑就接招！」

嘩，呢個尚穆根講到咁「大」，有啲險喎。因布蘭森著名乜都敢，今次更有機會揚威國際，睇嚟極可能接戰。尤其初步睇，尚穆根完全唔同班數，兼又意氣用事，衝動到大罵英國乃十九世紀賣鴉片的國家，有乜權對亞洲國家指指點點？

我一於買定花生啤酒，擔凳仔睇呢場辯論。因單單由毒品定義（例如大麻）被多國推翻開始砌，到毒販使唔使死，都有百花齊放論點㗎！

曾智華

阿碌開咪

 

編按原題為「輸咗好大鑊㗎喎」