【維港會】1歲B識講廿隻動物名識叫長輩 新手媽問是否聰明

每個父母都希望自己子女天資聰敏，有網民在「親子王國」發文分享自己1歲的BB已經懂得講廿幾隻動物的名字，又識叫公婆爺嫲，新手媽「問我個BB算聰明嗎」，有網民留言讚好，但也有人覺得只是「自己BB係眼中都係寳」的心態。

這位媽媽分享，她的女兒現在1歲，「喺佢8個月時我買咗啲動物咭片比佢玩下，玩左幾日，無意中我發現佢好似已記得某啲動物，嗰時我一講豬/狗/貓佢已識指出咭片位置，到而家一歲，佢基本上已認得/同識講廿幾隻動物的名，我屋企有好幾副咭片，佢每副都已記得同講得出八成」

她透露，「公公、婆婆、爺爺、嫲嫲佢一早識講，但佢連佢哋叫咩名都記得，會講出黎，早幾日我同佢玩嗰陣，同佢講幾次狗狗係dog，佢第二朝訓醒已識得講出黎狗狗dogdog」、「我女食奶肚餓聽到奶奶呢隻字會發癲，一定要立即飲，墊晒地，咁我地就轉講milk。點知講多2日，佢又都知milk等於奶，又扭到癲咗，而家講個M字代替。昨晚佢同我哋講M係奶奶係milk」。

這位媽媽直言，「我冇任何想人讚的意思...因為我新手媽媽，暫時又冇其他朋友/兄妹有BB，所以唔知係咪其他BB都係咁」。

有網民讚好，「你小朋友記性都好好。再觀察一下是否真係聰明」。

不過也有人指，「每個BB在媽媽心目中都係叻架啦， 特別係家中第一個。」、「你係得呢度問，應該大部份人嘅BB都做到，冇咩特別。」、「每個BB係媽媽嘅心目中都係特別叻....但別介意，路途還長，一歲到十八歲中間還有十七年，變化可以好大，當小孩越長越大，你會發現只要他/她不受朋輩影響，而然足矣...我家小孩一歲九個月才開口說話，兩歲時卻已能背誦三字經，當年也感大慰，隨著歲月，卻發現平安不壞已經很好了」

也有人分享自家的經歷，「我個女15個月先識行，18個月先開始叫媽，一直唔覺佢特別叻，一年級學期尾老師叫佢去做測試先知係資優，我唔覺得有乜特別」、「我記得我仔一歲時識咗一樣嘢中文，例如狗，跟住再同佢講狗英文係dog , 佢死都話唔係，係狗。鬼咁蠢 」、「聰吾聰明唔係咁睇的，我只能話現階段你擔心小一件事。我仔三歲才開口講野你會覺得佢聰明嗎？」