【頭條獨家】唔亂使錢行名店得個睇字 單文柔上圍豐滿肚凸凸行街

囡囡小豬比(Quinta)就快兩歲，單文柔仲後生得30歲，有仔趁嫩生，所以明白陳展鵬點解要睇中醫調理身體。日前《頭條日報》記者見到陳太單文柔同鍾晴去銅鑼灣行街，老公搵到錢，陳太連環行咗兩間名店，睇袋又揀首飾，不過時勢唔好，奢侈品可免則免，陳太好乖冇入手，行完街就Call車返歸，細心啲望，陳太有個肚腩仔，上圍又好澎湃，係抗疫肥定有咗呢? 採訪:梁志明

之前有報道話陳展鵬密謀全力追仔，所以就頻頻睇中醫補腎，當事人話相中嘅佢冇戴口罩，應該係年幾前嘅舊相，不過呢段新聞刺激到44歲嘅佢同老婆嘅造人計劃，他笑說：「疫情下大家顧住身體健康，本來冇諗過生仔問題，但考慮到個女喺屋企好悶，而家會順其自然，生仔都要趁後生，再過10年自己未必會生，怕無能力同小孩玩。」

陳太身形都幾飽滿

唔知係咪都打算再生，所以單文柔生完囡囡後都無刻意收身，當日佢同鍾晴去銅鑼灣利園食日式Pancake，之後就去睇BB傢俬，隨意望無話想買乜嘢，然後再去行LV，睇兩女舉動，應該係鍾晴想買嘢，上圍好豐滿嘅陳太陪佢，兩人係咁研究小手袋，諗咗一陣就轉去Chanel，今次就睇首飾，陳太係咁睇耳環，揀揀吓仲坐咗喺度用紙巾抹眼，最後鍾晴有嘢啱，前後行咗半個鐘就入手，再行去莎莎，有個肚腩仔嘅陳太一入去就揀口罩，買完就Call車返歸。