被指億萬駙馬望認識抨擊者化干戈 劉威煌多謝太太支持

《劉威煌REBIRTH音樂會2021》昨晚於麥花臣場館舉行，於七成入坐率限制下全場爆滿。劉威煌亦絕無欺場，8時30分開場唱足3小時，全程滿場飛多次跟歌迷們近隔離交流；歌迷們反應亦非常熱烈，散場後仍捨不得離開。

到了Encore部分，劉威煌有感而發，說：「要多謝我太太，有報道吹到好大話我係億萬駙馬，話我軟飯都唔識食。我就係咁硬頸亦唔係乜嘢億萬駙馬，我只想識多啲人，做自己喜歡嘅嘢。佢好支持我，嚟緊送首歌畀太太，佢都唔知㗎。」隨後唱出《你是如此難以忘記》。到了唱最後一首歌《巨輪》，他更邀請圈中好友，包括黎瑞恩、林師傑、區永權、羅凱玲（Judas）、何婉盈、關寶慧及海俊傑等上台大合唱。

完騷後接受訪問，劉威煌表示想不到歌迷們如此熱情。問到個唱可否收支平衡？他笑笑表示仍在計數，相信僅僅可達標。他說：「自己人氣唔夠，只可以開到一場，相信你哋都知開一場好難平手。不過唔緊要啦，自己亦無諗過會有Part 2，但我已經無憾。」

提到為自己澄清「億萬駙馬」舒一口悶氣，劉威煌坦言都不知道何來此稱號。對網上有不少侮辱性抨擊，他不介意亦不會還擊，反而希望有機會親身認識抨擊者，化干戈為玉帛。