超低胸床上典嚟典去 Billie Eilish新歌MV瘋狂「倒奶」

美國樂壇炙手可熱嘅19歲創作歌手Billie Eilish出道以來形象獨特，憑住一頭螢光綠配黑髮造型加Oversized衣着配搭，乜都唔做齋企喺度都認得佢係邊個。不過早前佢大改形象以性感造型登上時尚雜誌《VOGUE》英國版封面，染咗一頭金髮加性感馬甲大哂超澎湃身材，樂迷反應超兩極，有人讚好有人叫唔好。我行我素的Billie一於少理，事關她出道初期就係怕俾人惡意批評身材先著鬆身衫褲，家陣人紅自信多咗，懶理負評最緊要自己鍾意。

Billie昨日推出全新單曲《Lost Cause》，繼續踼走怪異風格，再次以性感造型示人！歌詞內提到Billie對前任嘅行為失望，直指對方是廢物，配合MV入面Billie同老友搞性感睡衣派對嘅畫面，象徵女性釋放自己，唔再活喺前度陰影之下！

MV由Billie自編自演，請咗6個好姊妹齊開睡衣Party，成班大胸囡囡着晒低胸衫，喺床上黐實晒又對住鏡頭唱歌，仲要「金絲雀」咁典嚟典去，心口巨肉能見度極高，難得Billie完全唔怕走光！典完床又去客廳忘情熱舞，眾人跳上枱係咁扭蘿，又不停彈彈吓，咁高性感指數嘅Billie真係第一次見，MV中眾囡囡玩飛鏢、噴彩帶又亂食零食，務求以狂歡派對釋放自己！

對於Billie今次身材大晒冷式MV，Fans都紛紛留言大讚Billie非常性感，更讚她性感得嚟唔色情低俗，成功傳遞女性要拒絕被物化、堅守身體自主權嘅訊息！