【獨家】返港賺錢兩個月回歸蘇格蘭 喬寶寶開心宣佈8月抱孫

3年前見證住大仔「印度豹」娶醫生老婆嘅喬寶寶講明恨抱孫，喬寶寶為咗盡快達成心願，每逢周末就同太太及細仔去妹妹間餐廳幫手兼小住，讓兩公婆可以過吓二人世界！寶寶用心良苦下終於有成果，剛離港的寶寶向本報報喜，興奮表示8月中將榮升爺爺，喬家將四代同堂，認真恭喜晒。採訪：方騫平

移民蘇格蘭的喬寶寶返港兩個多月後已打道回府，離港前夕契姐黑妹姐(李麗霞)為他搞咗個小型棧別宴，兼且為Joe Junior祝壽，郭秀雲仲帶埋罕有嘅灰鸚BB女賀壽，Joe哥好開心多謝黑妹妹！郭秀雲指Joe哥係50歲生日，而基哥(李龍基)同Joe哥齊齊報喜，表示兩人分別喺9月及10月開演唱會。

寶寶想男女孫都有
不過，全場最歡喜莫過於趕住返屋企等抱孫嘅喬寶寶，他開心說：「我恨做爺爺好耐，有咁好DNA，不時催促佢哋快啲生，因為媽咪想更上一層樓(四代同堂)。我冇問係孫仔定孫女，我叫佢砌過好字出嚟，最少都1男1女，如果第1個係女，第2個咪搏吓仔囉！第2個係女咪搏到仔為止囉，我要做十兄弟姊妹爺爺！講吓笑啫，其實今時今日生兩至三個就夠，𠵱家冇重男輕女，不過，至少破到我得『兩件』紀錄呀！」黑妹姐說：「呢3年寶寶走咗我有少少冷同寂寞，因為冇人喺身邊講笑，佢玩法似擦鞋仔咁，每次我都好唔捨得佢，記得第一時間畀張孫BB相我呀！」寶寶乘機引黑妹姐笑，他說：「我細個嘅願望就係做可以上到市嘅擦鞋仔！」嚇到黑妹姐馬上修正擦鞋仔說法：「其實細佬氹得我開心啲，甚至有朋友話我哋愈嚟愈似樣，唔好玩啦！」