【疫情婚禮】180名賓客要打齊防疫針 可宜婚後不設防：想生兩個

中英混血兒、前有線主播可宜與甲一港隊籃球員鄭錦興今晚舉行婚禮，除圈中好友鄭啟泰擔任司儀外，瑪姬亦是姊妹團之一，張學潤、黃健東等亦有出席婚宴到賀。新娘子可宜穿上一襲低胸婚紗，而新郎鄭錦興則以一身穿傳統蘇格蘭禮服一同會見傳媒，應要求下多次親嘴拍照，場面溫馨。

可宜透露今晚宴請了180名賓客，由於疫情需要打齊防疫針才能參與婚宴。她說：「事前已問清楚賓客打針意願，都有啲尷尬，而身處英國嘅姐姐未能嚟港參加婚禮，惟有睇直播見證教堂行禮嘅情況。」她更大爆與老公行入教堂時，發現老公經已感動流淚。

談到原本婚禮於去年平安夜舉行，礙於疫情需要延期，可宜說：「延期咗8個月，但依家仲可以多啲賓客嚟，度蜜月冇得出埠可以去西貢同長洲，如果可以去度蜜月都想去家鄉蘇格蘭。」可宜表示老公身穿的蘇格蘭禮服，布料是蘇格蘭空運來港，價值不平，而格仔布的圖案代表她的姓氏。

談到愛的宣言，新郎鄭錦興表示一路走來並不容易，愛情路上有好多歷練，將來會更加好。問到造人計劃，二人均表示想生小孩，但可宜認為隨緣，她說：「唔好有太大壓力，不過都會努力，雖然老公好喜歡小朋友，但都唔會生一隊籃球員，希望將來生兩個啦。」