偕師姐林宣妤演出舞台劇 姜卓文：希望可以超越爸爸得到認同

姜大衞孻仔姜卓文（細John）與兩位師姐林宣妤（Serene）與蘇子情（Gabriella）在經理人穿針引線下，獲得參與舞台劇《香港生死書》的演出機會，而《香港生死書》由知名文化人胡恩威擔任導演、編劇及設計，故事以A至Z的26個英文字母進行創作，包含26個香港人與動物的生死故事，本周六（4日）正式假文化中心公演。

為了應付8場的舞台劇，細John、Serene、Gabriella閉關排練，每日排足12個小時，細John早前與爸爸姜大衞以父子檔合作拍攝短片《離不開的牛雜麵》大獲好評，被指傳承了爸爸的演技。首次做舞台劇，細John期待又緊張：「始終第一次做舞台劇，要面對咁大個舞台，之前拍戲習慣有得剪接，可以NG重拍，舞台劇無得NG，要一Take過最完美的演出，所以真係會緊張，經過連日來的排練，做足準備後就開始有信心會做得好。」拍戲無數的姜大衞原來舞台劇經驗並不多，曾客串過一兩次，偏偏細John第一次就成為主角，會否想在舞台劇方面超越爸爸？細John笑言：「我當然希望可以叻過佢，喺做舞台劇方面，所以我要更加努力，希望得到認同。」

同樣是首次演出舞台劇的Serene反而不是太緊張：「因為好多人一齊做，感覺上無咁大壓力，之前上咗一啲課堂，學放鬆自己，真係好有用，成功解決上台前嘅焦慮，可以好自然放鬆演出。」而Serene為自己所唱的歌填上歌詞，雖然之前無填詞經驗，但只用了兩個多小時就成功填好歌詞：「突然有啲字係我個腦出現，一路播首歌個腦就一路自行填上歌詞，真係好神奇，希望觀眾會鍾意。」