Juicy叮｜上車後寧返父母家食飯留宿 業主呻新居無歸屬感「似staycation」

香港地物價高企想置業向來都不容易，但有剛剛上車一年的新進業主，卻嫌棄層樓無歸屬感，引起網民詫異。

「香港討論區」網民稱，一年前趁樓價升幅不大就上了車，當時亦都因為遇到個好經紀才找到現在的單位，「當時我都好信樓緣，層樓係你就係你，唔係你點都唔係你，層樓最後都係屬於我，畀我搶到」。但住了一年，「覺得層樓好無歸屬感，似staycation 多過似自己屋企」。

他稱，未上車前與家人同住，食慣「住家飯」，所以上車後照樣回父母家處食飯，照樣交父母家用，有時如果太夜就索性留在父母處住宿，所以新屋不是經常住，「同事問我住邊，我都講照講話同屋企人住公屋」。

他透露，現時每月供樓要16,500元，當中有5,500元是利息，每個月還要交一千多元管理費，以及地租和餉，不過他「上咗車之後，都係咁生活，都係咁照亂使錢，做得唔happy就會祼辭，唔會好似啲人講到買咗樓要點點慳，咩點畀心機做嘢」。

他大呻，「其實一個人住300尺，應該都唔算太差，但唔知點解對新屋完全無歸屬感，唔覺自已有層樓，亦都覺得供樓其實係好輕鬆，起玄學角度黎講，一層好的樓係住到唔會搬，相反一層唔好的樓，就會好快搬走，唔通層樓其實係唔適合我? 點先可以有返啲歸屬感?」

他又列舉出新家的缺點，新居行去港鐵站要過馬路，綠燈下只需5分鐘 ，但如果遇上紅燈要成10分鐘；新家用手提電腦 ，父母家用桌上電腦 ，有時返到新屋因為手提電腦不好用，乾脆連電腦也不打開；新居距離公司較遠，搭車要多5分鐘時間。新居是開放式廚房，抽油煙機是循環氣流 ，煮食不方便。

但他又認為，新居是單棟樓人口密度低，搭升降機少遇上其他鄰居；新居清靜，經常聽歌或睇戲大聲都不怕被人投訴，「有時夜晚10點都照爆機，公屋隔音較差，一定唔可以咁做」；新居的健身室免費任玩，因為管理費包含在內，而健身器材質素更好過外面的健身室。

有網民留言說，「依家有會所嘅新樓尤其是一房或開放式嗰啲，畀人感覺都係似酒店房多過似個『家』況且你只係住咗一年，又仍然返咁多父母屋企，對新屋冇歸屬感係正常。」、「有家人喺裏面一齊住嘅，先叫做家。如自己一個人住嘅，只可以稱之為一間屋。」

有人則建議，「好明顯你仲係裙腳仔心態, 未有心理準備獨立。我明白的, 在(父母)家千日好，搬出嚟就乜都自己搞掂。再加上一條友無謂為搬而搬，你不如放租先, 返去同父母住到你日後組織家庭你就唔會痴住屋企架喇。再講多樣，新屋太近父母家都會降底獨立意欲，你試下一東一西，焗住自己搞掂」、「咁你租佢畀人，先搵人幫你供囉。可以先搬返屋企住，到將來想同居或結婚才搬過去，到時多一個人自然就多返歸屬感。」

但也有人認為發文者是無病呻吟，很多人連基本住屋都捉襟見肘，何況有一層多出來可以「staycation」的樓。

帖文轉載自「覺得自己層樓好無歸屬感」