古天后日誌｜港股成交萎縮歸咎於失敗政策

11月18日，部份時間有陽光，日間溫暖，晚上有微風，呢O的天氣最舒服。美股隔晚回吐，三大指數下跌，道指跌211點；標指跟納指分別跌12點及52點。美股今年表現超晒班，不過喺美股仍氣勢如虹之際，大摩較早前調低標指明年底目標至4400點，更直言美股明年或跑輸歐洲及日本股市。不過高盛啱啱唱反調，將明年底標指目標調高約9%至5100點水平，原因係企業業績亮麗等導致市場樂觀情緒，能沖淡放緩嘅經濟增長及加息預期。無論分析對美股後市樂觀與否，美股現處高位係事實，企業未來盈利表現，能否目前偏高估值係重點，總之去呢O的水平，美股再好景都好，仍要時刻提高警覺，有心理準備隨時出現較大幅度調整。

至於港股真係無乜好講，表現一直落後美股幾十條街，近日唔少缸邊友，尤其較年輕嘅炒家，不單止將港股投資比重減少，甚至去到完全放棄唔玩亦大有人在。歸根究底，港股今年長期表現疲弱，係幾個利淡因素夾擊，包手內地對不同行業嘅監管；內房股嘅債務問題；以及增加印花稅後，令交易成交大增，都令投資者對港股卻步。

早於今年初財爺提出增加，古天后已經講O左有機會係得不償失，有關印花稅收入，可能不增反減，結果不幸而中。近大半年以嚟，港股成交一直縮水，年初日均成交超過2000億嘅情況已不復見，增加印花稅並有有令庫房收益多O左，反而係趕客令港股成交萎縮。

增加印花稅呢半年，本來港股唔算多嘅高頻交易幾乎消失，活躍散戶亦因為交易成本大增而減少操作，傳統證券行面對網絡券商嘅激烈競增，更加係門可羅雀，連連鎖效應影響下，股民之消費意欲必然大減，其他行業也難以獨善其身。都已唔知幾耐，港股一直係塘水滾塘魚，缺乏資金推動，上升動力亦大減，港股狀況可以話係慘不忍睹。

奇怪係有關當局對此視而不見，未有用手了解實際情況，作出撥亂反正之舉，一於當睇佢唔倒，若然財金官員繼續蹺埋雙手置之不理，恐怕港股將繼續陰乾，香港國際金融中心地位岌岌可危，前景堪虞。一個殺雞取卵嘅政策，喺業界反對聲意不絕下仍獲立法會大比例通過，未知財金官員跟投贊成票嘅議員，目睹目前港股嘅慘況，心中有何感受。

　　古天后

　　(徐狄怡，證監會持牌人)