古天后日誌｜供應鏈問題持續 或引發通脹甚至滯脹

12月28日，多雲，早上有一兩陣雨，早上寒冷，日間短暫時間有陽光。連續三日假期放完，但假日情懷未退，呢個星期只有三個半交易日，唔少缸邊友仲放緊假，相信呢幾日市況持續淡靜。至於美股就繼續做好，三大指數連升四個交易日，隔晚道指升351點；標指跟納指分別升65點及217點，標指更連續兩日創收市新高。

雖然變種病毒Omicron傳染力強勁，有專家警告美國喺未來一段時間之內，確診個案將持續攀升。不過有分析指，如果變種病毒影響力溫和，美國明年中或可以達到充分就業，聯儲局可能喺明年6月開始宣布加息，若然情況相反嘅話，首次加息時間或延至明年底。其實歐美等地已接近與病毒共存，有別於內地跟香港堅持清零嘅做法，事實上，病毒變種後殺傷力大不如前，雖然傳染力高O左，但染病者少有變為重症，醫療系統負荷未見增加。

目前疫情最大影響，係全球供應鏈問題未能解決，為通脹火上加油，喺第二及第三季，雖然唔少國家已局部開放邊境，但貨船塞港等現象未消退。更甚者，Omicron變種病毒出現，再為全球經濟前景添上陰霾。不少分析指，供應鏈阻塞情況最少持續至明年中，再加上四缺問題，包括缺櫃、缺艙(運載空間)、缺工及缺車(陸上處理貨物的司機)問題更不知何時才能解決，運費有機會再度上升，行業前景更不穩定。

預期明年航運市場仍高於供給，不過有國際評級機構穆迪近期仍將全球航運產業未來12至18個月的展望，由「正面」下調至「穩定」，認為航運業利潤今年已見頂。惟運費仍將維持在較高水平。市場對大宗商品需求將保持強勁，但因今年基數高，航運業的資本支出續增，預計明年增長或有所放緩。

雖然國際供應鏈遇阻，但經濟復甦卻帶動需求增長，多國通脹升溫，中美經濟大國亦無幸免，通脹恐蔓延至全球。疫情持續擴散，令糧食供應鏈和產業鏈不容樂觀。據聯合國糧食及農業組織統計的最新數據，全球糧價在過去一年多，至少上漲了四成。疫情可能會持續更長時間，使供應中斷時間更長，從而帶來通脹壓力，多國面臨滯脹風險。

展望明年，雖然疫情或逐步減退，但喺通脹陰霾下，各國央行面對兩難，局住收水，此舉或影響經濟復甦，預期個別新興市場通脹或達雙位數困境，引發新興市場債務見頂甚至爆煲。換句話講，即使2022年疫情退減，但代之而起嘅通脹，甚至滯脹問題，或成為更大威脅，或成為股市最大衝擊，不得不提防。

　　古天后

　　(徐狄怡，證監會持牌人)