古天后日誌｜港股21000水平穿梭暫未見突破

6月21日，天氣炎熱，部份時間有陽光，局部地區有驟雨，嚟緊幾日更加熱。隔晚美股休市，歐洲股市普遍向上，為對抗通脹，歐央行決定繼續加息，但同時又擔心經濟衰退，以及歐債喺加息下出現危機，歐央行考慮一邊加息，一邊QE是否可行。道指期貨回升，新加坡黑期高水，預期今日港股將略為高開。

喺通脹高企下，市場已傾向相信，美聯儲局喺6月加息0.75厘下，7月再加息0.75厘機會愈嚟愈大，9月再加息0.75厘嘅機會率亦升至四成以上，喺年底前息聯邦利率應見3厘或以上。今晚鮑爺將出席聽證會前，道指期貨向上，似乎市場正打賭鮑爺未必再放鷹。

雖然美股搖搖欲墜，但港股近日表現偏強，即使成交未見顯著上升配合升勢，港股亦能咬住21000水平企硬，睇嚟6月都係好友佔上風。港股得以企硬，主要靠A股強勁表現。基金入市態度積極，私募基金嘅倉位已高達七成，不過散戶入市並唔積極，主要係散戶資金喺3月抄底反彈時，唔少散戶追貨資金又被鎖死，只係阿爺喺5月開始放水，令市場資金較為充裕，暫時A股仍可維持強勢。

資金喪炒細價股並好現象

至於港股仍然喺21000水平穿梭，連日嚟出現日升日跌嘅反覆狀態，即使市場唔少預測指港股有能力上試22000至22500水平，礙於美股嘅表現，港股都未能重返4月中高位。而大市成交亦未見配合，重磅股升至現水平亦出現疲態，資金開始流去細價股尋找機會。

資金喪炒細價股並非一個好嘅現象，好似殘都飛起嘅教育股，過去個幾星期錄得驚人升幅，不過市場喪炒之際，大戶一於少理，你有你炒高，我有我鬆綁走人。新東方在線(01797)喺短短個幾星期暴升十倍，其主要股東之一嘅騰訊(00700)趁機套現走人，高位幾乎盡沽手上股份，在手上持股從超過9%降至不足2%，難得喺熊市之中搵到一道逃生門，騰訊都要講聲「走先喇，係咁先喇」。睇返之前北水炒到出煙嘅石油股、煤炭股及基建股等等，近日明顯走弱，唔排除本輪反彈已到尾升。而幾件重磅科技股，喺現水平亦停滯不前，就算好友呢個月幾把炮，要將大市推上22000又談何容易。

古天后

(徐狄怡，證監會持牌人)