古天后日誌｜機構投資者傾向現水平沽貨套現

7月4日，多雲，有驟雨及狂風雷暴，天氣持續不穩定。美股上周五再見V彈，主要係10年債息回落至2.8%，今晚美國獨立日假期休假，但道指期貨仍然有交易，目前喺亞洲時段偏軟，睇嚟今日港股難免腳軟。喺市場都已接受喺高通脹下，美國要繼續加息，年底息口更要高企於3%以上之際，10年期債息卻反其道而行，回落至2.8%水平，好明顯係市場正打賭美國經濟或步入衰退，屆時息口要掉頭向下。

其實從資源價格開始走軟，銅價已跌至每噸8000美元水平，或反映經濟有機會步入不景氣，而銅嘅使用量一直係經濟領先指標之一，需求下降，自然就係經濟衰退嘅先兆。除咗銅價之外，油價亦見頂回落，即使油價仍處於100美元水平之上，但油股已從高位回落。再睇另一個業績表現唔錯嘅半導體板塊，更加慘不忍睹，股價一再穿底，喺經濟步入衰退嘅環境下，各行各業都難以受惠。

有見及此，坊間有指聯儲局可能隨時出手救市，加息變減息，但喺通脹仍高企下，減息似乎無乜可能，尤其聯儲局已多次強調目前首要任務係先控制通脹，而聯儲局已被唔少經濟學者指責，聯儲局喺已錯過最佳加息時間，反應慢半拍。若然家下又急急腳話減息，其公信力只會再被質疑，況且目前美股只係較高位回落16%左右，就算要救市，都等到標指回落至2020年疫情爆發前頂，先考慮停止收水先叫合理。

六不絕 七月必要無翻身

至於港股經過五不窮，六不絕之後，七月即係無翻身必要，反而要考慮係7月能否延續6月升勢，咁就要睇再有冇資金流入支持大市向上。再有冇新資金進入港股市場，古天后無水晶球，當然不得而知，但眼見係騰訊(00700)主要股東出爾反爾，講到明再喺市場沽貨，要沽幾多貨無講明，但從CCASS睇，高盛就多咗9000萬股貨待價而沽。

而另一個例子係商湯(00020)喺上周一到半年禁售期完結，即出現斷崖式單日大跌逾四成，超過30億元嘅股份已先注入CCASS等沽貨，而沽貨嘅投資者，當然係上市前已入場ABCDE輪嘅機構投資者，佢哋嘅成本係幾多，當然平過IPO價，即係話就算現水平沽貨仍有利可圖。

另外市場一直擔心等錢使嘅軟銀，隨時要沽阿里(09988)套現，咁啱得咁橋，CCASS喺上星期見到花旗就接咗超過7億股，而呢批股份睇怕又係待價而沽。即係咁講，就算港股唔再插水，但唔少人喺呢啲水平都係等緊沽貨套現，多過積極入市，而港股喺22500水平阻力唔細，睇嚟7月嘅港股，或者步入上落市格局。

古天后

(徐狄怡，證監會持牌人)