獨家丨羅敏莊陳國邦送愛女泰國升學練獨立慨歎10歲陳禛仲未識縛鞋帶

2022-07-24 20:00

早前有調查指出，現在要培育一個小朋友成長，由以往估計的400萬已增至620萬，適逢DSE文憑試日前放榜，究竟家長要安排子女教育問題，除了英、美、加、澳等國家升學，還有何選擇方向呢？羅敏莊（Mimi）和陳國邦可能給予家長們新的睇法，因他們已決定送快10歲大的女兒陳禛，8月到泰國繼續升讀國際學校year 5，貪當地有無敵靚校園，令女兒讀書也特別開心，加上泰國跟香港距離近，搭幾小時飛機便到，就算有突發事件都不用怕。

撰文：杜淑霞攝影：沈健程

陳氏一家下周便起行到泰國，他們似度假一樣心情好興奮。

陳禛在泰國即將入讀的國際學校「HARROW」，校園內有湖，環境一流。

Mimi和阿邦早在六、七年前，已愛上到泰國旅行，當地好多地方都去過，聽朋友講泰國的學校好大好靚，而且也可以如旅遊景點一樣安排參觀，雖然當時陳禛年紀還小，他們抱住好奇心態決定一看，看後即被吸引。Mimi說：「睇完發覺校園真的好大，設施亦幾好喎！香港一向寸金尺土，地方實在不夠用，學校地方自然會細，見到那邊地方咁大，真的心心眼！不如我們就plan定，我們去當地生活一吓，阿女就在當地讀書。」

Mimi和阿邦幾年前已在泰國買樓，而且離陳禛學校不遠，只需半小時車程。

泰國買樓必包裝修和傢具，所以收樓時似去了示範單位。

曼谷置業學費較平

幾年間，Mimi和阿邦為新計畫鋪路，先在曼谷巿區置業，以300多萬港幣在鄰近BTS站的地區買了約850呎單位，足夠一家三口居住。今年終於決定實行計畫，原來疫情成為最大推手，Mimi說：「之前冇諗住咁早，因為我自己都有好多工作在手，但疫情關係工作停了好多，好多人話見到我好多嘢做，但比起之前已經少了很多，是時候陪伴陳禛過去讀書，起碼趁這段時間送她過去，將她安頓好，我就可以自由點，可以回來專心工作。」

當地房屋大部份廚房，都是採用開放式設計。

在泰國的家坐擁一望無際的風景。

陳禛在泰國即將入讀的國際學校「Harrow International School Bangkok」，一年學費約港幣17萬，加埋寄宿費約港幣11萬，都比起香港讀國際學校經濟得多。不過Mimi最想陳禛到泰國升學，是希望她可以在學校寄宿學習獨立，「我成日覺得我細個讀書錯過了寄宿生活，應該會很好玩，當然我好多朋友話可能會好孤單好慘，但都想她由細個試吓訓練她獨立，因為我們太寵愛小朋友，她到現在都未識縛鞋帶。」Mimi問陳禛識不唔識縛鞋帶？陳禛用英文答：「因為我的鞋都不用縛鞋帶。」Mimi就解釋知道她不識縛，於是買些沒鞋帶的鞋給她。再問陳禛懂不懂煮即食麵和洗衫等，她統統都不會做。Mimi承認家務向來由家傭姐姐代勞，所以她認為寄宿才能令小朋友真正獨立，「有好多嘢可能要自己做，未必自己需要洗衫，但叫人幫你洗衫都需要，她在家是不用叫也有人幫手，我想她學懂這些事，另一方面是我都要學識放手，老公經常話『你咁樣唔掂，死梗，放唔到手』。」

阿邦經常笑Mimi，始終未能放手，讓囡囡陳禛真正獨立。

陳禛最不捨朋友仔

阿邦謂，所指的「唔掂」是Mimi跟陳禛母女感情太好，怕Mimi未能適應囡囡不在身邊，「阿女唔去寄宿，留在屋企只係對你（Mimi）好喎！哈哈！其實大家都會認同小朋友的學習能力和適應能力比我們強，所以對於陳禛，我不會太擔心，佢咁聰明、咁醒目，反而我返香港拍嘢，阿女又寄宿的話，得返Mimi一個人，擔心她會不會好寂寞呢？可能瞓緊覺突然喊住咁話『陳禛唔喺度！』，好似產後抑鬱咁。而且阿女由出世到現在都是『middle Chan』，你睇現在坐就知，她瞓覺都瞓在我們中間，阿女到現在仲同我們一齊瞓。」所以暫時Mimi都捨不得安排陳禛寄宿，「講得啱，我是放不到手，其實老公話不如一次過送她去新學校順便寄宿埋，我就諗如果有兩件事都陌生怕她難以應付，我希望她先適應新學校，等她適應了，再實行第二件事。」

Mimi主持完TVB《日日媽媽聲》，暫時在港未有新工作，可專心陪囡囡讀書。

至於即將離開香港升學的「小主角」心情呢？陳禛想了想說：「我有少少唔開心，因為我會掛住我的朋友，但我亦都開心的，因為新學校大啲囉！好靚，新學校應該會好些。」問到陳禛短期內見不到陪住她成長的貓貓會否不捨得？她坦白說：「但牠們周圍瀨尿喎！最唔捨得都是朋友。」陳禛又話沒甚麼必須要帶的物品，除了電腦和父母，就連香港的美食她都不擔心食不到，「泰國那邊應該會有多些，譬如有些糖香港冇，應該有些新口味我未試過，我食唔到辣，但去到都會試吓。」在港就讀英式國際學校year 5的陳禛，也認為在學業上需要點適應期，「我都想現在過去泰國，因為老師同我講，之後讀year 6有些功課會好難。」不過因疫情可能令課程有滯後，所以陳禛到當地仍會讀year 5，但Mimi認為反而更好，讓她有多些時間適應新環境。

陳禛（前左一）在香港一直入讀國際學校，所以Mimi和阿邦不擔心她難適應。

兩地往來方便減低相思苦

雖然出發在即，但見到Mimi和阿邦心情相當輕鬆，似去度假一樣，連出名錫貓的Mimi，也不擔心一屋老貓，「工人姐姐會繼續keep住在家，她都好鍾意貓，當了是她的屋企人，況且全部貓都十幾廿歲，冇可能帶牠們一齊去，牠們舟車勞頓都驚牠們會有事，況且我會返來，我不會太擔心！我沒有那種離愁別緒，因為我心態不是這樣。」Mimi連執行李也很簡單，「我帶衫的宗旨是不用燙就可以，我連燙都不想，不夠就在那邊買就可以，沒有甚麼需要帶去。」

Mimi認為家中六隻貓都年事已高，所以讓牠們留港安享晚年。

阿邦雖然會陪太太和女兒一齊飛，但因他九月要回港繼續浸會大學的教學工作，加上他年初剛跟英皇簽約，相信能留在泰國陪家人的時間不多，但他完全不擔心，「因為並非突然之間決定，泰國地理環境又近，就算有任何突發意外，幾個鐘頭我已經可以飛到過去，又或者我在那邊放緊假，公司同我講要補戲，幾個鐘頭就可以返嚟，呢個地理環境完全不是障礙，畀阿女去泰國讀書是可以減低相思、分隔兩地情緒。」講到跟英皇合作，阿邦認為是因緣際會，去年因疫情工作量不多，於是到內地碰運氣，結果找到參與電影《掃毒3》機會，而電影回港取景他順理成章返港，就遇上英皇的工作人員，最難得老闆楊受成肯遷就他每年九至十一月的教學工作，再安排工作。新發展亦令他對未來發展充滿信心，「我有信心亦都肯定，公司一定會帶我行得快點，我本身好似烏龜一樣上緊位，現在有公司搵條繩再幫我拉。」

阿邦（後左一）剛完成電影《內幕》，日前出席公司電影《神探大戰》首映。

迷上砌積木不愁寂寞

九月開始，阿邦可能有段時間，要獨自在港生活，但也不愁寂寞，因他近年迷上玩LEGO，更已全面進佔他的書房及天台位置，他先後已砌過過千件作品。不過要數當中最有代表性，肯定是將所住的村屋，經電腦程式設計好，再訂所需配件去組裝，「最花時間是電腦上設計，足足花了四、五個月，但有程式幫手下，就不會浪費資源，可以不斷在電腦上試用各種組件，不適合可即時更換，試到啱為止，反而落手去砌好快就搞掂。」