古天后日誌｜阿里以香港作第一上市有望納入港股通

7月26日，天晴，長時間有陽光，酷熱天氣持續。美股隔晚個別發展，道指跟標指回升，但SNAP上周五急挫嘅陰影令科技股繼續受壓，納指跌51點。嚟緊幾日仲有唔少大型科企公布業績，加上聯儲局議息，市場傾向觀察。

市場預計今次聯儲局將加息0.75%，9月再加0.75%機會亦超過四成，不過市場已消化相關加息幅度。反而週四晚公佈嘅GDP更值得關注，由於經濟放緩，市場已將第二季GDP預測下調至0.3%增長，由於Q1 GDP已出現負值，若Q2意外地再出現負值，美國就陷入技術性衰退。即使Q2仍保持輕微增長，但上月唔少企業開始裁員，預期失業率於Q3會由歷史低位3.6%回升，Q3 GDP唔會好得去邊。

中港股市偏弱兼成交靜

至於中港股市呢邊，走勢偏弱，成交淡靜，「爛尾樓」事件困擾未完，不過阿爺話咗高度關注，當然要開始做嘢，有消息指阿爺計劃籌建規模達3000億元嘅「房地產基金」救亡，用以支持12家已出事房企繼續起樓，唔停工就可以確保業主繼續供樓。至於呢3000億喺邊度嚟，咁就梗係央行再加四大國有銀行同埋其他內銀齊齊籌旗。不過問題就嚟喇，內房企業唔少已連債息都還唔起，本金就一味有拖無欠，家下又搞多3000億基金出嚟，呢條數日後唔知啲內房可以點還錢，睇嚟又係要內銀硬食。

阿里巴巴(09988) 公佈，董事會已授權集團管理層申請喺香港聯交所主板主要上市。相關主要上市流程預期將於2022年年底前完成，其後阿里巴巴將成為以美國存託股份於紐交所，以及以普通股於香港聯交所雙重主要上市公司。阿里將港股改為第一上市地，有人話係為咗美國退市作準備，先唔講阿里合唔合符美國上市審計規則先，阿里以香港以為第一上市地，最快出現嘅得益係可以符合互聯互通資格，咁未來加入港股通，北水就可以買貨喇。呢個消息短線對阿里股價當然係正面。

講返港股，恒指失咗頸線20700之後，噚日再回試20500水平，剛好係3月及5月底部伸延上嚟嘅底部支持，最終呢個位叫守咗，只係近日成交持續縮水，即係港股由22000水平調整到現水平，都未見有資金肯入場撈平貨。究竟係現水平唔夠平，抑或係高位有貨，資金已被套死，無論點都好，成交低迷反映咗市場係缺乏資金支持。

古天后

(徐狄怡，證監會持牌人)