環星20周年丨張偉文開騷遇不禮貌對待好激心：可能唔知我係邊個

2022-08-08 18:15

張偉文與經理人方俊、姚煒、方麗盈等今日在尖沙咀出席「環星娛樂成立20周年」記者會，張偉文在今年2月確診新冠肺炎，情況一度危殆，幸現在已康復，上月（7月）更在沙田舉行《張偉文友情有義演唱會》，他笑指上次的演出完全無壓力，反而沒有工作才有壓力。

張偉文雖然已經康復，但出入仍要坐輪椅。

姚煒同方俊全程陪住張偉文。

現年69歲的張偉文有「靚聲王」美譽，但原來在上次的音樂會上，卻發生不愉快經歷，疑有年青一輩的工作人員不認識他，張偉文說：「安排我出場嘅人，可能唔知我係邊個，當時佢對我話：『輪到你啦，唔好四圍走』真係激死我！（那人是誰竟不認識你？）唔講邊個啦，可能佢想認識我先咁樣講啦。」

姚煒表示是透過方俊認識張偉文，在一次飲茶聚會上聽到張偉文清唱黃梅調，覺得十分好聽，之後每次相約練歌姚煒也會很早到場，就是要聽張偉文唱歌，她說：「上天賦予佢咁好嘅聲線，佢普通地唱已經好入咪、好有磁性同好有吸引力，呢幾十年來唔係因為張偉文，我都唔會走上台唱歌，真係不可思議。」方俊則感謝姚煒及大家對張偉文的關顧，令張偉文不但身體好了更令腦袋靈活。