古天后日誌｜港股磨人心志 令人拒絕再玩

8月18日，大致多雲，有幾陣驟雨，日間短暫時間有陽光，天氣炎熱。美股隔晚下跌，升咗咁耐，回下都好常，道指跌171點；標指跟納指則跌31點及164點。美國聯儲局公開上次會議紀錄，官員認為可能有必要收緊貨幣政策，加息周期將會持續，加息步伐幾時放緩，都係要睇經濟數據表現。暫時官員一致認為，「幾乎沒有證據」表明通脹壓力正在消退，需要相當長時間先可以解決問題。

美聯儲局暫無意鬆手，貨幣政策仍傾向緊縮，10年債息回升至2.9%，債息回升對科技股嚟講當然唔係好事，納指連續兩日回吐，不過暫時喺資金充裕下，美股仲頂得住，估計喺下個月聯儲局議息前，美股都會頂倒幾下頭鎚。

騰訊(00700)派咗成績表，營收跌3%，non-GAAP跌17%，盈利在連跌4季度後，跌幅開始放緩，ADR股價反彈至313元，不過以前高增長日子已不復再，有貨喺手借今次業績減磅都好正常，加上320元阻力唔細，今日有機會高開低走，自己好執生。

至於早兩日有外媒報道騰訊有意減持手上美團(03690)股份，噚日公布完業績順便澄清相關傳聞，話就話無減持計劃，不過之前將手上京東(09618)股份贈予股東，唔排除稍後以同一方法去減持手上美團股份。

有波幅 冇升幅

不過，睇返之前騰訊送京東，京東都只係短線見沽壓，其後股價亦慢慢上返。雖然騰訊暫時唔沽美團股份，美團股價亦見反彈，但力度唔算大，只係企返上170元水平，無法上返減持傳聞之前180元水平，可見市場信心有幾弱。

港股除咗面對缺水問題之外，信心薄弱亦係另一大問題，無論邊一個板塊都好，都已進入有波幅，冇升幅嘅狀態，買入股份後，稍有微利要落車，否則結果又係資金被套死，散戶屢敗屢試，屢試屢敗，手上購買力被消耗嘅同時，連意志心志亦被打擊，最後只有放棄港股，拒絕再玩。

古天后

(徐狄怡，證監會持牌人)