仁愛堂丨泳兒Gin Lee做《聲夢2》導師勁上心 每日瞓幾小時試過向學員發脾氣
2022-08-21 13:15 
李幸倪（Gin Lee）與泳兒昨晚（20日）到電視城為《善心滿載仁愛堂》擔任表演嘉賓，同是《聲夢傳奇2》的導師的她們更有合唱環節。提到《聲夢2》時，兩人不約而同表示近期為了幫一班學員準備致每天無覺好瞓，Gin Lee解釋是因為每次比賽完，幾位導師便即時要幫學員準備下回合，故每天只睡4、5小時致嚴重睡眠不足：「因為時間好緊迫，我哋想爭取時間，想盡快幫佢哋揀歌畀佢哋練習。」
至於泳兒就則表示已捱了幾日通頂，每天要到早上8點才睡，每日只睡2、3小時的她坦言為了一班學員嘔心瀝血，而且更搞到男友投訴：「佢話駛唔駛咁着緊，試過有個學員話喉嚨唔舒服，佢（男友）話『咁都關你事？』我話喉嚨同唱歌有關。我有7個人要照顧，我要一打七，要花好多時間，但我都開心嘅，因為同佢哋冇代溝，佢哋又好勤力，好肯去嘗試去做，我個心態係，希望留得佢哋幾耐得幾耐，如果佢哋被淘汰，我會崩潰。」問她如何𠱁男友？她指10月會開演唱會，而開騷當日正是男友的生日，到時會安排對方看演唱會，問到可會邀請男友上台，她笑說：「佢冇乜技能喎！不過之後會同佢補祝，最多嗰日一齊合唱生日歌畀佢聽， 都真係要𠱁番嘅。」
Gin Lee表示教每個學員都要花時間和心思，因為他們年紀小及要上學，又指自己雖然有工作，但亦會將學員放在第一，問她是否不敢對學員太惡，她就直言有次因覺得學員不夠勤力而忍不住發脾氣：「我哋幾位導師仆心仆命陪佢哋綵排到凌晨一點，好畀心機教佢地，但佢哋仍然話冇信心，嗰吓我就有少少勞氣，我同佢哋講『你哋唔可以咁，我唔係嚟做保母，我哋係導師，幫你哋提升音樂上嘅嘢，如果你哋咁唔珍惜，我就唔做』，自從嗰次之後佢哋個心態就180度轉變。」問她以後還敢不敢做導師，她就笑言要慎重考慮。至於泳兒則指曾為學員不覆機而發脾氣，她説：「我發現啲小朋友係選擇性覆機，我唔係強迫症要你即刻覆，冇理由全日都唔覆，呢樣嘢我覺得要調教小朋友，我嗰次講出嚟之後係有改善咗，可能依家見到我嘅訊息會好驚。」
立即下載 | 全新《星島頭條》APP : https://bit.ly/3yLrgYZ
最新回應