古天后日誌｜二十大變數多 食花生做觀眾穩陣

10月13日，天晴乾燥，日間氣溫略為回升，今晚部份時間多雲，下周天氣顯著轉涼。隔晚美股偏軟，公布PPI略高於預期，三大指數續跌，不過跌幅已收歛，唔少淡倉開始喺低位平倉。由於市場已完全消化息率於年底將升至4.25%水平，喺無其他太利淡消息下，淡友唔敢太放肆，亦把握機會喺低位食糊。PPI升幅略高於預期，反映通脹仍於高位徘徊，就算息率升抵4%之上，短期亦難以減息。近日美股就係借短期息率仍高企，聯儲局仍要大力加息，先狂掟二三線股份，而近一個星期，就連科網龍頭股亦捱唔住，好似Tesla喺短短兩星期急跌兩成，美股亦似乎出現終極一跌。

呢個星期美股開始踏入業績期，噚晚有百事可樂打頭陣，業績交到功課之餘，公司亦上調全年業績指引，百事可樂股價表現唔錯，借住業績反彈，淡友今次未有借業績好消息出貨，如果今次業績期公司都好似百事咁交到功課，美股大有條件迎來一波反彈。

公布完心PPI，今晚較到CPI出爐，上月嘅CPI公布後，美股急跌4%，而目前標指已跌至通道底部，究竟好淡雙方誰勝誰負，今晚嘅CPI係關鍵。大行對CPI公布嘅預測係數字有所回落嘅話，美股有條件彈返2%，相反CPI高企其至高過預期，美股最差可以跌4%。留意VIX仍然高企，一旦VIX升穿35唔排除觸發新一輪跌浪，相反女VIX回落至28水平之下，美股就有條件反彈。

中概股連跌四日後靠穩，電動車股蔚小理持續反彈，應該係噚日A股拗腰回升嘅助力，二十大前A股嚟一個V型反彈，之前阿爺曾放風，上證要力保3000，暫時亦話畀市場知，3000嘅上證係沽不得，只係深滬兩市成交額合共只有7102億元，且看今日A股表現如何。

至於港股噚日亦隨A股午後反彈，可惜成交額喺每次反彈都未能配合，港股仍然係陰乾式向下尋底，只係淡友係咪可以舒舒服服坐住啲淡倉，答案係否定嘅。好似噚日午後就曾借A股反彈而大挾淡友，由低位反彈600點去到17000水平。不過最終淡友力抗下，收市恒指回落至16700水平，而ADR跟夜期則回落至16600水平，睇嚟淡友並未打算撤退。內地下周展開二十大，抗疫政策會否有改變，近日人民日報再三強調清零政策要堅持，加上有傳聞指李克強或要退落嚟，咁經濟優先政策或有改變。總之二十大有唔少變數，咁嘅情況下，都係食下花生做觀眾穩陣。