古天后日志｜二十大变数多 食花生做观众稳阵

10月13日，天晴乾燥，日间气温略为回升，今晚部份时间多云，下周天气显著转凉。隔晚美股偏软，公布PPI略高于预期，三大指数续跌，不过跌幅已收敛，唔少淡仓开始喺低位平仓。由于市场已完全消化息率于年底将升至4.25%水平，喺无其他太利淡消息下，淡友唔敢太放肆，亦把握机会喺低位食糊。PPI升幅略高于预期，反映通胀仍于高位徘徊，就算息率升抵4%之上，短期亦难以减息。近日美股就系借短期息率仍高企，联储局仍要大力加息，先狂掟二三线股份，而近一个星期，就连科网龙头股亦捱唔住，好似Tesla喺短短两星期急跌两成，美股亦似乎出现终极一跌。

呢个星期美股开始踏入业绩期，噚晚有百事可乐打头阵，业绩交到功课之馀，公司亦上调全年业绩指引，百事可乐股价表现唔错，借住业绩反弹，淡友今次未有借业绩好消息出货，如果今次业绩期公司都好似百事咁交到功课，美股大有条件迎来一波反弹。

公布完心PPI，今晚较到CPI出炉，上月嘅CPI公布后，美股急跌4%，而目前标指已跌至通道底部，究竟好淡双方谁胜谁负，今晚嘅CPI系关键。大行对CPI公布嘅预测系数字有所回落嘅话，美股有条件弹返2%，相反CPI高企其至高过预期，美股最差可以跌4%。留意VIX仍然高企，一旦VIX升穿35唔排除触发新一轮跌浪，相反女VIX回落至28水平之下，美股就有条件反弹。

中概股连跌四日后靠稳，电动车股蔚小理持续反弹，应该系噚日A股拗腰回升嘅助力，二十大前A股嚟一个V型反弹，之前阿爷曾放风，上证要力保3000，暂时亦话畀市场知，3000嘅上证系沽不得，只系深沪两市成交额合共只有7102亿元，且看今日A股表现如何。

至于港股噚日亦随A股午后反弹，可惜成交额喺每次反弹都未能配合，港股仍然系阴乾式向下寻底，只系淡友系咪可以舒舒服服坐住啲淡仓，答案系否定嘅。好似噚日午后就曾借A股反弹而大挟淡友，由低位反弹600点去到17000水平。不过最终淡友力抗下，收市恒指回落至16700水平，而ADR跟夜期则回落至16600水平，睇嚟淡友并未打算撤退。内地下周展开二十大，抗疫政策会否有改变，近日人民日报再三强调清零政策要坚持，加上有传闻指李克强或要退落嚟，咁经济优先政策或有改变。总之二十大有唔少变数，咁嘅情况下，都系食下花生做观众稳阵。