古天后日誌｜港股仍要經過漫長收集方能有起色

11月1日，三號風球高掛，大致多雲，間中有幾陣驟雨，風勢頗為強勁。隔晚美股偏軟，議息前夕市場觀望，美股三大指數下跌，反彈升抵阻力位後，暫未見太大回吐壓力，仍在高位整固。總括上月美股表現不俗，尤其踏入業績期後，不少股份都從低位反彈，尤其績後市場變得樂觀，只係大部份股份從低位反彈超過一成，甚至反彈逾兩成後，值博率亦隨之下降，嚟到呢啲位，市場自然唔多願意追貨，形成美股暫時喺高位整固，再升需要有更大動力或利好消息刺激，後市先有機會再上一層樓。

如今已有超過一半標指成份股公布業績，當中超過七成表現好過期，不過遠超預期嘅只有不足4%，今次業績唔算有太大驚喜，不過企業盈利增長放緩程度好過預期，加上唔少股份已從高位回落三成以上，美股喺低位反彈亦不無理由。本周四FOMC議息，議息會後聲明將主導市場情緒，而加息0.75%幾乎塵埃落定，反而會後聲明會否為未來息口路徑提供更清晰路線，係市場較為關注。至少息率走勢如何，通脹表現將成為關鍵，不過近日油價已開始定落嚟，加上唔少企業旗下產品，亦唔再見加價，就以Tesla為例，經過幾輪加價後，上週開始減價，結果Ford電車亦跟住減價，除咗係預期成本下降，亦有可能係預期需求下降，總之企業嘅呢啲舉動，反映通脹有望見頂，預期明年5月通脹將回至低位，企業未來要處理嘅係如何拉動需求上升，唔再係控制成本上漲。

至於港股都係嗰句，昨日未能借上周五美股做好而反彈，反而恒指再創新低，雖然多日成交額都keep到喺1200億樓上，可惜係去到高位就見沽壓，反映市場仍然係峰高沽貨，資金就算低位肯接貨，亦唔肯坐貨，港股目前除咗欠缺新資金入場，另一個問題係欠缺信心，無信心自然就無人肯入場，就算港股跌到蔗渣價，睇怕都要時間令市場信心恢復，經過漫長收集，港股方能有返啲起色。