古天后日誌｜留意恒指20日線失守反彈將結束

11月10日，天晴，市氣略為回升，市區最高氣溫28度，唔通今年真係無冬天?? 隔晚美股顯著下跌，由於中期選舉並未如預期般，共和黨能輕易獲勝，暫時仍未有結果，若然不似預期，共和黨未能奪回一個議院，如繼續由民主黨獨大，就有機會keep住加稅，對美股後市嚟講，當然並非好事。除咗中期選舉未有結果，而結果亦有會不似預期之外，今晚美國亦會公布CPI數據，若然降速又唔符合預期，美股有機會借勢再插水。暫時標指再度逼近3700支持，而納指10300支持不容有失，再穿今次納指或一萬大關不保。

至於虛幣市場仍然七國咁亂，FTT事件繼續發酵，幣安計劃收購FTX，但做完資產審查就反悔，有傳涉及不當使用客戶資金，監管當局將介入調查。FTX的姊妹公司Alameda繼續拋售比特幣及以太幣套現減債，兩主要虛幣價格再度大插15%及18%。最新消息係FTX負責人開始失聯，FTX官網已經下線，法律團隊齊齊辭職劃清戒線。虛幣大跌令資金出現壓力，市場資金再次risk off，加大美股沽壓。

今晚CPI亦對美股後市有大影響，若然CPI未有降速回落，債息繼續高企，對科技股不利，納指淡倉位持續增加，近日已見市場有人預估明年息率或高見6%，幸而債息未有跟隨向上，10年債息反而回落至4.1%，主要係市場預估下月加息0.5%嘅人愈嚟愈多。

內地未見放鬆防疫措施，動態清零跟精準抗疫方向未變，廣州唔少小區仍處封鎖狀態，中概股又插水。電動車股回吐壓力大，除咗股神繼續減持比亞迪(01211)，那邊廂Elon Musk亦沽Tesla套現，對汽車股整體氣氛利淡。

恒指見咗16821高位，低位反彈逾二千點後無以為繼，主要係呢兩日成交額縮水至1200億元之下，反映16000樓上願意追貨資金有限，可能大市需要喺16000邊進行整固，但係失守16200短線密集區底部並非好事，除非今日大市回試萬六關再配合成交增加回升，否則呢一浪反彈隨時玩完。