古天后日誌｜短線反彈累積巨大升幅應食糊套現

11月14日，大致多雲，日間部份時間有陽光。美股上周五繼續反彈，美匯指數轉弱，資金流出美元區，美股三大指數再升，不過嚟到呢啲水平，唔排除美股都抖抖。睇返標指由上月中開始反彈，於3491反彈至上周五收市3992，不足一個月已反彈接近15%，當接近下一個阻力位4100，預料更多獲利資金食糊，美股或又要步入整固期。目前市場係憧憬明聯儲局有機會減息，條件係當CPI降速加快，並回落至2%水平，唔單止加息周期有望結束，莖至有條件減息。今個星期美國公布嘅PPI數據，將對未來息口走勢有更大啟示。

港股上周五升逾千點，並以1825億元成交配合升勢，總算係有個似樣反彈，成功收復50日線後，下一個目標係18000-18200點。本論反彈升抵18000水平後，港股何去何從，睇嚟又係時候睇返企業嘅季度業績表現。雙十一購物節低調結束，暫時未見各大電商公布實時交易金額，亦係無乜好消息公布，成個購物節嘅成績如何，大家應該心中有數。由於內地疫情反覆，物流影響購買意欲，過往嘅衡動消費亦已減少，電商購物已見飽和，要如何進一步刺激需求，係電商未來遇到嘅一大難題。

疫後經濟復甦將拖累科網平台業績表現，雙十一銷售數據不算理想，活動預售期由上月底至今，市場未見太多，暫時影響科網股更大嘅整體大市走勢。港股喺不足一個月已累積頗多升幅，算投資者未有大手掟貨，高位亦唔見得會難積極入市，估計恒指上方阻力18200唔容易過，大市到達18000水平，亦需要時間整固，18000唔係咁易話企就企，呢啲位古天后選擇執一執個倉，尤其係之前有喺低位撈貨，更應好好把握食糊機會。