世界盃2022｜專欄：踏入黃昏的歐洲紅魔
2022-11-23 13:30 
今屆世界盃有好多球隊都主力老化，其中一隊就係比利時。
現時國際足協世界排名第二嘅比利時，曾連續四年排名世界第一，但始終同世界盃冠軍無緣。呢隊無冕之王喺上屆俄羅斯世界盃，同上年歐國盃都係熱門球隊之一，可惜最後都係輸畀當屆冠軍，世界盃四強負於法國，而歐國盃八強則敗於意大利腳下出局。
世盃後四年已過去，當年黃金一代嘅成員大部分都已經超過三十歲，其中奇雲迪布尼雖然狀態甚佳，但已經年屆三十一歲，中場拍檔韋素都已經三十三歲；後防維頓漢同艾達韋列特亦分別已經三十五歲同三十三歲，更已經唔係喺歐洲主流聯賽效力；前鋒盧卡古雖然今年只係二十九歲，但今季備受傷患困擾，上半季已有長達兩個月缺陣，另有現年三十一歲已被投閒置散嘅「前世三」夏薩特。
雖然現時比利時隊中，個別位置仍有新星冒起，如中場泰利文斯同翼鋒李安度杜沙特，但主力老化問題其實相當嚴重，首戰比利時要面對第二次躋身世界盃決賽周嘅加拿大，取勝甚至之後小組出綫應無大問題，但要更進一步恐怕會有啲力不從心。球樂
立即下載 | 全新《星島頭條》APP : https://bit.ly/3yLrgYZ
關鍵字
最新回應