世界盃2022｜專家分析:高盧雞能擋雄鷹展翅？
2022-12-18 14:15 
今屆世界盃終局之戰，乃上屆十六強嘅翻版戰，當時阿根廷以三比四輸給法國，今屆會唔會歷史重演呢？艾爾覺得今屆嘅阿根廷唔可以同上屆相提並論。
上屆由森柏奧利帶領嘅阿根廷，外圍賽最後一場艱難嘅勝仗，先令球隊可以飛去俄羅斯。嚟到決賽周，「森帥」寧願用希古恩、美沙、基斯甸柏雲呢啲表現唔特別嘅前線球員，阿古路長居後備，不論選人、排陣定臨場調動都惹人詬病，最後十六強出局，森柏奧利難辭其咎。艾爾曾經講過今屆阿根廷嘅轉變，今次唔再重複。總之，上屆「潘帕獅雄鷹」好似一隻病入膏肓、毫無活力嘅鷹，今屆已經生猛好多，表現同上屆截然不同。
法國今屆晉級過程睇落無乜嘢，但艾爾覺得上兩仗已經暴露咗唔少問題，尤其球隊完全唔做逼搶，中後場不斷受壓嘅時候，可以話險象環生。嚟到生死一戰，球隊再傳出壞消息，有傳華拉尼同伊巴希馬干拿迪抱恙在身，烏柏美卡奴雖然好番，但狀態未到十足，可能要由威廉沙列巴同班捷文柏華特頂替，而拉比奧特同京士利高文上陣未明。今仗法國可能有唔少輪換，即使前線入球穩定，但關鍵時刻作大幅輪換，始終係大忌。加上，艾爾覺得迪甘斯作風保守，換人亦非常遲緩，對手狀態同陣容完整程度都較好，「高盧雞」今仗未必踢得輕鬆。
一隊要為美斯達成「有終之美」，一隊要成為事隔六十年後，第二支能夠衛冕成功嘅球隊，最後係「鷹」定「雞」可以奪走大力神盃？艾爾情感上是全力支持阿根廷，投注上就買全場入球大細「2.5」大，之後專心睇波算！艾爾
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應