古天后日誌｜美元轉勢有助新興市場回春

1月16日，多雲及乾燥，早晚天氣寒冷，日期短暫有陽光，氣溫急降，個別地區溫度降至單位數，大家注意保暖。上周五美股繼續做好，三大指數上升，道指升112點；標指升15點，逼近4000大關，納指重返11000升平，升78點，已連升六個交易日。上周累計，道指跟標指升2%及2.6%；納指升幅更達4.8%。喺美股向好下，上周五夜期跟ADR亦上升，預期今日又高開，能否高開高走，古天后有少少懷疑，畢竟上周開始現貨成交已見縮水，愈接近農曆年長假期，交投只會更趨淡靜，喺缺乏成交配合下，港股唔大幅調整已算強，再大升似乎有難度。

留意今晚美股假期休市，不過呢個星期有唔少重要經濟數據公布，包括周三公布每月零售數據，以及12月工業生產及對通脹有前瞻作用嘅生產物價指數PPI。同時美股業績期已開始，上周多家大型銀行公布業績，本周仍有投行高盛及大摩派成績表，周五輪到Netflix業績。

而中國第四季土GDP按年僅增長1.7%，本周五公布嘅一年期貸款市場報價利率LPR或向下調，變相放水，只係年關將至，阿爺想大力放水亦有心無力，預期呢個數字唔會有乜嘢驚喜。日本將於周三公布議息結果，雖然預期政策利率維持喺負水平，但市場關注日央行會否釋放有關何時幣策正常化信號，此前日央行已容計其息率波動性擴闊，變相加息，已帶動日圓回升唔少。

美匯指數自從喺去年10月份見頂回落後，美元獨強局面不再，為過去一年因為強美元受衝擊嘅新興市場帶嚟喘息機會，畢竟強美元令新興市場嘅美元債務負擔壓力增加，加上輸入型通脹更令呢經濟狀況較弱嘅國家叫苦連天。不過隨住美元強勢局面扭轉，部份資金開始流入非美貨幣地區，有利推動亞洲區疫後經濟復甦。

去年美國激進加息以抗衡通脹，令美元獨強，逼使全球央行跟隨收緊貨幣政策，以免在息差擴闊下對本幣匯率造成巨大的貶值壓力和引發資本外流，即使是在俄烏戰爭下面對能源危機的歐元區，亦不得不持續加息抗通脹，可見強美元給全球經濟增長帶來極大風險。幸而喺俄烏戰爭持續下，歐洲未見出現嚴重能源危機，油價及天然氣價格回落，令歐洲央行唔需要再大幅加息以抑壓通脹。

去年支持美元強勢嘅兩大因素，包括日本之前極度寛鬆嘅貨幣政策，以及中國之前堅持嘅清零防疫政策有所調節，喺呢兩個因素變改下，美元上升周期見頂，強勢不再，資金轉向不同市場分散投資，唔再傾斜向美元，或為全球金融市場帶嚟機遇。近日外資大舉買入A股，已說明喺美元轉弱下，資金已不再鍾情美元資產，今年中港兩地股市，或有望擺脫去年頽勢，甚至有望走出熊市，步入牛市。