淘大花園無屍命案｜涉殺情婦董事：被威脅搞散全家失控㩒佢頸臉

已婚證券公司前董事陳文深在11年前涉於淘大花園某單位殺害情婦，將屍體放入尼龍袋後駕車運往將軍澳棄置。陳今日（14日）在高等法院詳盡講述殺人及運屍過程，他指情婦於案發前威脅他將會向傳媒透露他婚外情一事等，他便不由自主地「㩒佢條頸、㩒佢塊臉、掐佢口鼻」，但他解釋說：「我想㩒住佢唔俾佢出聲，我唔係想傷害佢」，「成件事唔係一個計劃，我無帶武器，我連車都無揸，係突然間發生，唔係我控制到嘅嘢，更加唔係我希望發生嘅事」。

陳憶述他當日上門與死者秦嘉儀分手，說明為了家庭需與秦劃清界線，殊不知秦大叫並以下流粗俗的話語咒罵他家人。陳要求秦不要再威脅他，卻被秦摑兩巴，雙方拉扯下倒地。陳坐在秦身上欲制服她，但她不斷掙扎並說：「你同屋企隻野雞生咗兩個嘢仔出嚟！」、「我唔會放過你，我會將我哋啲嘢講畀報紙聽，畀相佢哋登報，上你公司講晒畀所有人聽，你畀內幕我買股票，搞到你冇咗份工、身敗名裂、永無寧日、永不翻身」，又指會「搞到你老婆自殺」、「我知你住邊！我會搞埋你個仔！搞散你全家！」。

陳文深被控謀殺女子秦嘉儀。資料圖片

陳怒火中燒，只想秦「收聲」，並指秦的話語令其不開心、不滿、壓力迫出來，不能自控地出手按在秦的臉、口、鼻，在秦郁動時再用力按其喉嚨位置。陳解釋：「我個陣時咩都諗唔到，連成件事係安全定唔安全都諗唔到，我控制唔到我自己㩒、掐實佢個口同鼻，好似鎖實咗咁」，「我㩒住佢口鼻個下，我感覺到我身體好似有啲嘢爆咗，好似水壩被水係咁撞撞撞」，「我記得我爆咗之後嘅感覺，好似所有野湧出來咁」。

被問及他有沒有意圖殺害秦嘉儀時，他回答說：「我其實當時有咩意圖我都唔知，我淨係記得我意圖係想佢收聲，但我相信我自己係無依啲意圖出現過，我淨係望到腦海映像與地板。」他哭述：「我點會想佢死⋯我由頭到尾都想佢好，想幫佢，等佢無咁難過。」他又強調他對秦嘉儀的愛沒有停止，「如果唔係咁愛佢，咁關心佢，我點會連我最愛嘅老婆都呃」。

陳稱：「如果有得返轉頭，如果當晚唔係有咁多情緒、咁多壓力，又或者嘉儀唔咁波動、咁激烈嘅話，根本咩事都唔會發生。」他又自白在首次審訊時，「我覺得我唔可以講，我覺得好羞恥，做咗一件咁失控、咁可怕嘅事」，「我第一次講依啲事嘅時候，我仲同老婆同兩個仔一齊，我講咗啲好蠢嘅大話，我希望可以繼續同佢哋一齊，有少少希望我會捉住」。

他亦指他在第二次審訊時「好擔心人哋唔能夠接受依樣嘢，我自己覺得好羞恥去承認失控，我講完一個大話又一個大話」，「第一次（審訊）係為咗保護我個家，我唔想我做嘅事傷害或者影響我愛嘅人；第二次再講嘅時候，我好擔心，其他人好難會理解，點樣可以影響正常嘅人變咗另一個人，令佢自己都唔認得呢個人」。他說：「我變咗另一個人咁樣，我平時都唔用武力，好斯文，好好脾氣，我從來都無諗過要傷害任何人」，「我當時無咗理智，無咗判斷能力，咩都諗唔到」。

法庭記者：劉曉曦

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ