瑞信最高層下周現身香港出席投資論壇

近排歐美銀行引發嘅金融危機，搞到全球投資者人心惶惶，其中喺暴風眼嘅知名投行瑞信（Credit Suisse），雖然有央行「科水」暫時避過倒閉風險，但自身一堆內部問題仍有待解決。就喺呢個風頭火勢下，瑞信最高層們居然唔留守大本營，反而將會喺下周嚟香港出席自家主辦投資論壇，同特首李家超齊齊「Hello Hong Kong」，唔通係想順道安撫下投資者嘅心情，同搵「水喉」撲火？

瑞信舉辦嘅第26屆「瑞信亞洲投資論壇」（Credit Suisse Asian Investment Conference），將一連3日於下周二至四（21日至23日）喺香港舉行。今次不但係2019年疫情後首次以實體形式舉行，瑞信高層更傾巢而出，集團主席Axel Lehmann、集團行政總裁Ulrich Körner及亞太區首席執行官Edwin Low，都會現身香港。根據資料，佢地3人將分別出席論壇，各自喺一日發表歡迎詞。

呢次論壇喺香港一間5星級酒店舉行，以「擁抱新格局 （Embracing reality）」為主題， 探討在加息潮及地緣政治緊張的的新世界下，亞洲的世界地位、前景及將面臨的挑戰。瑞信依家自己都係「泥菩薩」，或者真係要聽下專家意見，睇下點樣應對依家嘅處境呢？

 

一按即看瑞信亞洲投資論壇賣點：

 

瑞信今年將在香港舉行亞洲投資論壇，是2019年疫情後首次。

該論壇集合了超過2000名投資者和230間全球企業，將有超過80名演講嘉賓，齊齊hello Hong Kong

出席者包括瑞信主席Axel Lehmann

出席者包括瑞信行政總裁Ulrich Körner

出席者包括瑞信亞太區首席執行官Edwin Low

出席者包括冒險節目《人在野》主持Bear Grylls

瑞信亞洲投資論壇一連3日舉行，以「擁抱新格局 （Embracing reality）」為主題， 探討在加息潮及地緣政治緊張的的新世界下，亞洲的世界地位、前景及將面臨的挑戰。

 

作為香港重新同世界接軌後，其中一項國際級大型金融活動，瑞信呢個論壇又的確星光熠熠，不但瑞信高層傾巢而出，更號稱集合咗超過2000名投資者同230間全球企業，將有超過80名演講嘉賓，除咗有香港行政長官李家超、港交所（388）行政總裁Nicolas Aguzin，更有知名冒險節目《人在野》主持Bear Grylls，佢將會喺論壇第二日下午以《 Pushing to the limit — is it really all in the mind?》為題演說，分享佢喺建立彈性心態同將人類能力推向極限方面嘅專業知識。