古天后日誌｜長線基金唔入場 港股難重現生機

6月30日，大致多雲，有幾陣驟雨，早上局部地區有雷暴，午後部份時間有陽光，天氣炎熱。隔晚美股做好，無懼鮑爺跟一眾地方行長齊齊放鷹，主要係美國嘅銀行成功通過壓力測試，喺銀行股帶動下，道指升269點；標指升19點；納指變動唔大，接近平收。美股嘅VIX已停留喺13水平一段時間，美股目前較為穩定，波幅收窄，短期仍未似有較大調整。

今晚美國將公布5月份PEC數據，市場預測為3.87，核心PCE數據已連續5個月持平，通脹唔再大幅回落，難怪聯儲局各行長口徑一致撐要繼續加息。債息略為回升，10年債息回升至3.83%，但似乎未有破壞美股強勢。

話就話美國國務卿訪話，為中美關係破冰，不過美國未有因此放鬆對中國制裁，反而進一步限制美國晶片企業對華輸出AI晶，荷蘭政府亦打算限制ASML向華輸出光刻機，西方國家對中國口講友善，但實際上制裁未有放鬆。制裁利淡消息下，中概股偏軟，港股喺噚日期指結算日亦走軟，跌穿萬九水平。

港股講到底都係資金不足，噚日成交額只有800億左右，樂觀嘅就話沽壓唔大，說穿了係跌落嚟都無買盤，升上去就更加無人願意追，買賣兩閒。雖然今日係半年結，但年初開盤恒指喺22000水平，睇怕基金都唔需要做乜嘢粉飾櫥窗，因為點粉都係粉唔到幾多，咁嘅情況下，今日個市能夠守到萬九已算好彩。目前港股係陰乾式唔上唔落，大戶睇住散戶做嘢，睇住散戶炒上炒落嚟食，呢啲市況基本上連搵食都艱難，莫講話要贏大錢，機會根本唔存在。唔想做大戶點心，不如離場食花生，待有長線基金入場儲貨收集，待基金收夠貨，港股方有機會重現生機。