古天后日志｜长线基金唔入场 港股难重现生机

6月30日，大致多云，有几阵骤雨，早上局部地区有雷暴，午后部份时间有阳光，天气炎热。隔晚美股做好，无惧鲍爷跟一众地方行长齐齐放鹰，主要系美国嘅银行成功通过压力测试，喺银行股带动下，道指升269点；标指升19点；纳指变动唔大，接近平收。美股嘅VIX已停留喺13水平一段时间，美股目前较为稳定，波幅收窄，短期仍未似有较大调整。

今晚美国将公布5月份PEC数据，市场预测为3.87，核心PCE数据已连续5个月持平，通胀唔再大幅回落，难怪联储局各行长口径一致撑要继续加息。债息略为回升，10年债息回升至3.83%，但似乎未有破坏美股强势。

话就话美国国务卿访话，为中美关系破冰，不过美国未有因此放松对中国制裁，反而进一步限制美国晶片企业对华输出AI晶，荷兰政府亦打算限制ASML向华输出光刻机，西方国家对中国口讲友善，但实际上制裁未有放松。制裁利淡消息下，中概股偏软，港股喺噚日期指结算日亦走软，跌穿万九水平。

港股讲到底都系资金不足，噚日成交额只有800亿左右，乐观嘅就话沽压唔大，说穿了系跌落嚟都无买盘，升上去就更加无人愿意追，买卖两闲。虽然今日系半年结，但年初开盘恒指喺22000水平，睇怕基金都唔需要做乜嘢粉饰橱窗，因为点粉都系粉唔到几多，咁嘅情况下，今日个市能够守到万九已算好彩。目前港股系阴乾式唔上唔落，大户睇住散户做嘢，睇住散户炒上炒落嚟食，呢啲市况基本上连搵食都艰难，莫讲话要赢大钱，机会根本唔存在。唔想做大户点心，不如离场食花生，待有长线基金入场储货收集，待基金收够货，港股方有机会重现生机。