古天后日誌｜蘋果iPhone15驚喜欠奉 港股萬八唔上唔落趕客格局

9月13日，大致多雲，有幾陣驟雨，局部地區雨勢有時頗大及有雷暴。隔晚美股總見下跌，主要係甲骨文績後股價急跌逾一成，加上蘋果公司發布會後，股價果然係高開低走，拖累大市氣氛，三大指數下跌。道指跌17點；標指跌25點；納指更跌144點。雖然暫時美股沽壓唔算大，仍然係高位徘徊，睇嚟今個月議息之前，都唔會有太大變化。

蘋果（美：AAPL）iPhone15無乜驚喜，價錢亦未有預期咁貴，但股價又喺發布會後跌，皆因華為嘅Mate60 Pro大賣，喺內地排美愛國情緒下，iPhone在華銷售未必受影響，明年上半年較難再有增長，以目前蘋果公司30倍PE嚟講，又真係貴咗啲，股價唔落返170美元樓下，吸引力有限。

相關文章：iPhone 15｜華爾街現「沽空蘋果」聲音 發布會後股價再跌1.7% 華為Mate 60 Pro成天敵？

美股炒經濟軟著陸，並憧憬經濟明年見底回升，油價回升至89美元，短期大有機會上試95美元至100美元，油股借勢炒上，加上醫藥股開始轉強，反而科技股轉弱，留意資金會否由新經濟股流入舊經濟股。美股後市升跌仲要睇住10年債息走勢，住6月財政部大手發行新債後，美債市場喺短短3個月內便吸走7,500億美元資金。美國未來12個月內將有31%短債到期，涉及7.6萬億美元，喺持續高息環境下，白宮喺未來兩年要開始捱貴息借錢，斷估美國無咁笨自己搬大石揼自己腳趾，要睇睇聯儲局識唔識做。不過明年係大選年，相信美國赤字會再度被兩黨擺上枱。小心喺財政預算案上兩黨會再次「玩嘢」，呢個係其後美股可能出現大震盪嘅一隻灰天鵝。

港股成交持續低迷

人民幣離岸價回升至7.30水平，中概股靠穩，但高追資金有限，恒指ADR回升52點，收於18,078點。港股週二先低後高，再跌70點回試18,000點水平，但成交縮減至841億，買賣兩閒局面繼續。港股成交持續低迷，空軍一直唔放過重磅股，沽空數量持續高企，散戶亦無心戀戰，形成一個低成交陰乾式慢跌格局。除非有新資金入場，至少要有資金入場同空軍抗衡，至少空軍唔可以太過放肆。但短期唔見外資會返轉頭，而北水又只係彈出彈入，基本無意願坐貨。散戶被割韭菜無數次，已唔想再入場作無謂犧牲，個個得個睇字，港股一潭死水，繼續係死魚一條，暫時喺萬八邊上落，完全係趕客格局。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ