古天后日誌｜阿爺再出招 成交待觀察 短線淡友只有先撤退

10月11日，大致多雲，日間大部份時間有陽光。美國聯儲局官員相繼「放鴿」，主要指金融條件收緊對經濟構成限制，有助遏抑通脹，從而降低咗進一步加息嘅必要性，利率期貨顯示，11月及12月加息機會分別減至12%和26%，為升至過高嘅債息降溫，美元亦隨之回落。隔晚美股繼續反彈，三大指數連升三個交易日，道指升134點；標指跟納指分別再升22點及78點，標指明顯守穩4300，暫時要睇上升通道頂部4480阻力過唔過到，VIX回試17水平。

明晚美國將公布9月CPI，係一個比較重要嘅數據，預期增長3.8%，主要留意核心CPI變化，環比增長可能達0.3%，但同比增長降至4.1%。其實美國經濟衰退程度遠低於市場預期，主要係疫情期間大搞QE，政府狂派錢令家庭儲蓄佔可支配收入急升，散戶大量資金湧入美股，支持美股喺疫情期間大幅上升。

睇返中港股市呢邊，長假期後A股連跌兩日，內地出遊數字表現理想，但相關股份周一卻大跌，反映資金一直趁好消息出貨，外資沽貨無停手，陸資沽貨更狠心，過去兩日深滬股市成交不足8000億元，雖然較9月底平均每日成交額6500億元有所回升，但遠低於第一季平均每日9500億元成交額。

正正因為A股跌跌不休，阿爺噚日收市後再度出招，有報道指中國準備再出招刺激經濟，可能再發逾萬億元人民幣國債，消息刺激反映中概股表現嘅金龍指數急升逾3%，港股ADR升近250點，黑期今早重上17900關之上。其實噚日消息一出，現貨恒指收巿後，期指已抽高百幾點至高水超過200點，昨晚夜期收17981點，最高見18010點。

預期恒指今早高開挑戰萬八關，較大阻力係由9月初高位回落至17100水平跌幅嘅反彈黃金比0.618，大約18200關口，而20日線17710則變成支持，企等20日線及萬八大關，短線仍有望挑戰50日線，但18300至18400阻力更大。

不過留意返，之前阿爺減息降準狂放水，但未見有真金白銀流入實體經濟，主要係民間已無力再借貸，銀行放水亦無人肯借，反映經濟差到一個點，呢一點噚日古天后都講咗。不過下月中，將會舉行習拜會，睇睇兩位首腦見面後，中美關係會否有所緩解，若然雙方關係改善，有助中港股市喺最後一個季度做返好少少，話晒年底都要粉飾櫥窗，基金佬唔做返靚啲盤數，年尾份花紅就凍過水。

相關文章：

憧憬美國不再加息 恒指高開292點 阿里美團升逾2% 綠債首掛沒「潛水」

---
星島X理大攜手推動永續發展 「ESG認證計劃暨嘉許禮」2023  把握報名機會 https://bit.ly/45kDhn5

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ