古天后日誌｜港股反彈阻力重重 5日線及16200不容有失

12月13日，大致多雲，初時有一兩陣微雨。聯儲局開始一連兩日議息會議，美國公布11月CPI降至3.1%，當從油價及租金回落，CPI已慢慢向下，只係跌嘅速度快慢嘅分別。將數字細分嚟睇，能源支出下跌5.4%，而一直因為租金高企拉高CPI，但第三季美國租賃空置率已創兩年新高，喺陸續供應增加下，租金增幅已放緩至6.5%，估計未來兩季加快下降速度，呢個係市場預期通脹威脅將解除，息口有望見頂嘅原因。

核心CPI降至4%，符合預期，喺租金持續回落情況下，明年CPI有機會回落3%至3.5%水平，只係回落至呢個水平，CPI下跌幅度及速度將會大幅放緩，亦跟美聯儲所期望嘅2%通脹有段距離，呢個要睇市場點解讀，亦係債市淡倉遲遲唔撤退嘅原因。

雖然美國11月份CPI符合預期，但按月恢復上升，顯示物價回到局方目標嘅路途並不平坦。市場第一反應係先拉高10年債息，美股借勢低開，不過美股資金充裕，低位又見買盤吸納，最終三大指數倒升，道指升173點，標指升21點，納指升100點。

雖然標指升至4600水平，估值方面當然唔係平，但市場仍然相當樂觀，把握回落低吸多於趁消息出貨，目前再入場買貨嘅資金，都係賭明年美股破頂，事實上美股流動性相當強勁，目前美元貨幣基金仍滾存高達5.7萬億美元資金，一旦明年開始減息，呢筆錢或由貨幣基金流向股票基金，美股自然有動力繼續向上。

美國經濟狀況遠勝歐洲，連環加息下，歐洲經濟開始捱不住，尤其係領頭羊德國，GDP已經是連續四個季度倒退，德國已開始捱唔到高息，更有理由支持歐央行提早減息。德國10年債息已回落至今年4月初水平，走勢明顯優於美債息，估計歐央行今次議息，態度有可能軟化，明年或早於美國開始減息。

11月新興股市ETF升7.9% 惟中國除外

隨著市場預期明年歐美央行或開始減息，歐美資金又開始抄底新興市場。油價下跌成為新興市場股市復甦嘅動力。11月新興市場股市ETF錄得7.9%升幅，但中國除外，債市亦進帳6.7%，同樣係中國除外，其中印度股市已創出新高，市值更已超越港股，成為全球第七大市值市場；阿根廷股市今年更累計上升275%，大行估計明年新興市場可跑贏歐美市場，高盛跟大摩預期，明年新興市場主權債可望錄得雙位數的回報，首推哥倫比亞、埃及的政府高收益債，但完全無提及過中國。

呢度已清楚解釋點解中港股市一蹶不振，無資金流入嘅市場，當然係無動力向上。港股今早黑期低幾十點，預期略為低開，即市恒指若下破5日線再失16200關，穿反彈勢頭恐難持續，要延續反彈，必需守穩5日線後，盡快向上挑戰10日線，但該水平16500至16600阻力頗大，喺缺乏成交支持下，恐怕難以做到。

相關文章：

中泰國際明年恒指目標20600點 最低萬五點 港股流動性壓力先慢後快

港股未跌完？富途料明年首季最差見14,000點

---

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ