基金經理劏散戶益大戶｜曾智華

過去一年新樓盤不停推出，全部「入票踴躍」，開售時「萬人空巷」，看似一片形勢大好。二手市場則靜如深海，交投疏落。點解會咁？唔係好多人想買樓咩？為乜只湧晒去新盤，現象是真的嗎？一半一半。

首先，新盤真的睇住二手嚟打，二手業主大部分不知市價，只想賺盡、開價過高，當然引不起買家興趣。新盤呢，發展商擁有大數據，完全知道市場消化力水平，於是開出低過二手價錢，結果當然吸盡所有購買力。

至於新盤的「人山人海」，多數是人為造勢。發展商「重賞之下必有勇夫」，肯出錢當然大把代理人效勞，這個絕非二手業主能懂。

新盤低開吸盡購買力

經紀（又名代理、基金經理、投資顧問）最高目標是搵錢，故此任何大客懂得「用」佢哋，就可以靠佢哋搵錢。乜叫「懂得」？簡單就是佣金闊綽，比其他人付出更多。各位可知發展商為推盤，最高可畀幾多佣金代理？講出嚇人，有機會問吓業內人士啦。

今期小弟想講吓個別「奸」的基金經理，如何搵大錢。這種手法存在行內已久，不過散戶極少知道。我有幸40幾年前做過倫敦金公司，目睹班奸人點搵食，原來不少基金經理手法，也是如此。

首先，一個經紀會簽多個客，大中小皆有。大客最識做，私底下應承經紀，賺到利潤最少畀雙倍佣金！舉例說，經紀在落單時，一日內可能每両在2至2.1萬元掃入幾十手金，經紀點做？將2萬元貨全篤入大客戶口；2.05萬元的入中客戶口；散客就吞2.1萬元的貨。金價一升，大客賺最多，經紀也分最多，不懂「遊戲規則」的中小戶，當然可能得個桔！

大客畀貴佣有平貨執

今天的超級基金經理又如何？服務的同樣有富豪大戶、機構中戶及一般散戶。玩法一樣，股票一日可以波幅甚大，若早午晚不停掃入同一隻股票，舉例港交所（388）最高入貨價280元，最低260元。咁佢就會將260元抵買貨益大戶，私人收取巨額回佣；而其他270元的由機構客戶吞。散戶當然硬食280元貨，鬼叫你係散戶水魚咩。

資深傳媒人 曾智華

---

緊貼最新最快新聞資訊，請立即下載星島頭條App：https://bit.ly/3Q29Vow