來自世叔伯的壓力｜曾智華

上周提及，撤辣之後樓市大趨勢將如何走向，人人望住一個指標——超人旗下港島南岸第3B期Blue Coast如何定價。結果相當震撼，因為第一批折實平均呎價只係18,998至24,072元！即係非常罕見發展商終願蝕本去貨的慘況，正在或即將出現。

超人慣技 嗦乾購買力

長實「樓神」趙國雄形容，這是「撈底價」，因該盤每呎成本價為2.8萬元。生意人冇死錯人，寧願蝕本掟貨，第一是代表睇淡後市，故要「走得快好世界」；第二也是超人慣技，快及重手過所有行家，以率先嗦乾全部購買力。

今次長實出手，首當其衝當然為黃竹坑港鐵站上蓋所有盤的定價，考起其他發展商到底跟唔跟。另外，Blue Coast定位為港島區優質豪宅，所有類似新盤，睇嚟都逃唔過鬥出血的命運。

昨晚與地產界老行尊A伯摸酒杯底，佢都搖搖頭話：「呢種情況難得一見，不過客觀講，做生意當然有賺有蝕，過去幾十年地產商賺到肚滿腸肥，如今小小出血啫，邊會有香港人同情吖，都係唔好扮大喊十嘞。」

發展商財務狀況極端

講開地產集團情況，小弟睇見資料，原來有啲背負天文債項；但有個別則坐擁大量現金，情況都幾極端，於是立即請教一下。

A伯話，「碌Sir你講的，行內眾所周知啦。時也命也再加欠缺慘重經歷囉，冇乜啱唔啱嘅！新世界由鄭志剛掌舵，佢年紀輕新意多，起步時正值旺市而息率低，故可大展拳腳，搞出好多以前老臣子唔識唔敢做的Project。事實上，若果息率不變，真係長途佢贏晒㗎。不過鬼知美國會突然暴力加息，我呢輩80年代見過10幾20厘息，但其時鄭志剛啱啱出世，點有感覺吖。」

A伯指出，新世界最大保護傘為背後的周大福，大把水唔怕。只不過新世界股東名冊內，有不少同是地產家族上輩人物，班世叔伯的微言，有好大壓力㗎！

提到欠債最少的信和集團，A伯笑笑口講：「黃志祥早年踩過大氹蝕鑊金，要老豆黃廷方打救，幾乎沒頂，交好重學費㗎。」

資深傳媒人 曾智華

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ