39歲林德信爆老竇林子祥陳年溫馨湊仔史要求帶埋結他入產房唱住歌陪老婆生B丨獨家

2024-07-08 07:00

去年11月，39歲林德信（Alex）與拍拖5年多的圈外女友Candace結婚，囡囡林明於3月出世。呢位新手爸爸自誇湊女有一手，講囡囡更講到唔停口，笑言一直有自彈自唱畀個女聽至出世一刻，他更夢想囡囡長大後可以跟老竇林子祥三代同堂齊jam歌。採訪：杜杜攝影：譚志光髮型:Henry Ho@Misalon 化妝:Kikoko 服飾:HOMME PLISSE ISSEY MIYAKE(Alex)、ISSEY MIYAKW(嘉嘉)、 Emporio Armani、Fossil、Watch Station 場地:Artisan Studio

Alex講起囡囡就好興奮，好樂意分享湊女點滴。

Alex和嘉嘉除了傾音樂，更不時傾湊女話題。

嘉嘉認為有音樂陪伴成長，會是很幸福的事。

Alex最近跟鄭嘉嘉合唱新歌《Drifting in Hyperspace(超空間) 》，合作源於曾在活動中邀請嘉嘉做樂手，後者主動將他的舊歌《愛的理由》改編，「因為太鍾意出咗先，《Hyperspace》就係覺得嗰次攞個平衡幾好，攞啲pop嘅歌加強個底，電子啲跳舞啲。」作為音樂人，嘉嘉謂當日忍不住要主動改歌，「嗰個場合，如果唱啲pop rock嘅嘢會好奇怪，全部玩電子，我咪同佢講不如改編你首歌啦！」

《Drifting in Hyperspace(超空間) 》MV切合歌曲懷舊曲風，Alex稱是意外，「去到個Club先知VIP房用懷舊裝修。」

Alex為新歌排舞，經常被排舞師取笑生硬。

自彈自唱畀囡囡聽

作為新手爸爸，Alex坦認最難是幫囡囡沖涼，其他就難佢唔到，「我試過1、2次，要沖多啲唔熟手，論論盡盡咁。」至於換片、餵奶、掃風？自稱餵奶餵到頸都歪的他稱OK，更得戚畀個like自己。Alex希望囡囡跟他一樣熱愛音樂，因有感音樂對他影響好大，「好細個鍾意音樂，去到大學發覺識寫歌，對我嘅成長同自信心係好大影響，未寫歌前個人好迷失，冇乜方向感，寫歌後畀到我自信心。」

去年11月，Alex跟圈外人Candace低調結婚。

今年5月，Alex宣佈2個月前已榮升爸爸。

Alex為令囡囡愛上音樂，早在太太Candace陀BB時已不停自彈自唱，「我有個好mini嘅木結他，夜晚瞓唔着就彈，來來去去都係嗰啲中英文歌，自己歌都有，會彈《Magic》，仲有寫畀公公婆婆嘅歌，同埋新歌《愛到發燒》。」為令囡囡出生時便接觸到音樂，他更向接生醫生提出特別要求，「畀我彈結他同唱歌畀佢聽，我每次彈結他唱歌，陀住BB嘅太太話覺得baby好安靜，我哋有個諗法，佢第1吓接觸嗰個聲係我彈嘅歌，唔知呢個記憶對佢將來會唔會有影響？！」

太太Candace陀BB時，Alex已經常自彈自唱畀囡囡聽。

囡囡一聽歌就唔喊

囡囡得3個幾月大，Alex已覺得她對音樂有反應，「有次我整緊《愛到發燒》嘅mix，baby喊緊，佢聽到即刻唔喊囉！」而他最愛自彈自唱𠱁囡囡瞓，「發覺越簡單越好，喺度試緊催眠嘅歌，通常用一句係咁重複。」講到父親節時，他將囡囡放在結他上彈奏，他笑言是抄網片，「睇ig啲片見到有人咁做，BB會聽到成個結他嘅震動，估唔到一擺佢落去佢就好定，即刻好似好舒服咁。」雖然囡囡仲細，他已計劃將來安排囡囡學彈琴，跟爸爸林子祥當年一樣，「佢有要我哋跟老師學彈琴，去到好大個，我第1次同佢講我有寫自己歌，佢叫我彈畀佢聽吓，我彈咗啲歌佢覺得好得意，又會分享吓佢嗰排寫咗啲咩歌，係好開心。」

上月跟囡囡度過首個父親節，Alex抄網片將囡囡放在結他上彈。

Alex已計劃和嘉嘉繼續合作，但不忘為囡囡創作，「但都有寫畀爹哋，由baby啟發到我，搵到靈感。我影《最愛》封套應該係1歲，冇記錯隻碟係1986年出，我計過爹哋生我時應該係38歲，我生我baby都係38歲，真係好橋。」提議他不如三代同堂一齊影封套，他笑言：「我肯，但爹哋又要參與我嘅碟。」另外他有個夢想就是一家人出歌，「係講全家包埋阿妹，但首先係好難約囉！（會唔會公開？）睇吓夾得開唔開心先，夾得開心就同大家分享。」