9個月三中港交所｜曾智華

本欄的資深讀者，必知小弟對一隻股票情有獨鍾，因不時提供「我又中」的滿足感，此股正是港交所（388） 。

筆者多次在本欄指出，此股實在有極度不合理的先天性優勢，因政府定下法例特許獨家「開賭」，禁絕任何競爭對手，猶如香港馬會，擺明塞錢入佢袋。

獨家「開賭」先天優勢

任何人無論「賭」股票、基金、債券……都要畀佢抽水，最攞命的是中央錫晒佢，視之為國家最重要的吸水（外匯）機器，故此國家由上而下，都擺明政策傾斜作優惠及保護。呢隻股你唔買，真係唔知應該買邊隻。

當然港交所上市之後，大量股民炒作，故此在2021年曾升至500元的癲價。不過基於港交所的底子實在太厚，有齊股神巴菲特師傅Benjamin Graham教落的3M投資大法特質：第一是Management（良好公司管理）；第二是Moat（護城河，中央及特區政府為最堅穩靠山）；第三是Margin of Safety（永遠有合理又安全價位作參考）。

跌到220元即掃貨

我一再指出，港交所正常情況下，合理價是260至280元，安全價是240至260元，抵買價是220至240元。故此當港交所因大市波動而跌至220元邊緣時，就應揮軍掃貨，再跌也就加碼掃貨，然後靜候升到超過1成利潤沽出，再等下次機會。

筆者多次在本欄指出，港交所實在有極度不合理的先天性優勢。

我講的法則自己當然切實執行，但也沒法想像到，今年單單9個月，已經可以「玩」足三轉，真的相當神奇！

數據會說話，港交所今年第一轉在1月23日見220元，短短幾日後的1月26日已見250元；第二轉在4月18日見212元，5月17日升見298元；第三轉在9月16日見218元，上周五就見243元。

港交所為何波幅會如此戲劇性？主要有兩個原因；第一是屬權重股。任何國際大戶要將恒指舞高弄低殺期指，絕對毋須揸或沽所有恒指成分股，只需要玩幾隻已夠，包括滙控（005）、騰訊（700）、建行（939）、中移動（941）、美團（3690）、京東（9618）及阿里巴巴（9988）。

另外一隻膽正是港交所。故上周四恒指曾急升400點，主要升的就是以上的股份。第二是港交所由於做「大莊」，故無論哪個板塊升皆受惠，大戶炒邊隻都益晒佢，大市整體上升更會變「肥豬仔」！

資深傳媒人 曾智華