今季3匹「投資馬」｜曾智華

每年到8月底，本欄都會提供來季值得投資的馬，注意是「投資」不是賭博。

馬匹就如運動員的高低，分天分、分質素，再分教練（練馬師）功力，加加埋埋必定是優勝劣敗。試想想，當今在跳水項目中，哪個可揮低全紅嬋？另外，100米自由泳，潘展樂也明刀明槍贏亞軍一秒！

馬圈同理，由一班到五班，平平庸庸的馬故然多，但去到一班的精英，必定是眾多因素組合，因而能夠彈離對手。這類馬若未大爆發前你能識於微時，就是最佳的「投資馬」。

今季我特別留意新練馬師游達榮，這位「天才神童」現今32歲，但早於28歲已贏得墨爾本冠軍練馬師頭銜，30歲再下一城，掃埋澳洲冠軍練馬師寶座，絕對不會是浪得虛名。其練馬生涯中贏盡澳洲一級大賽，今次來港，圈中人當然引頸以待，睇佢功力有幾深，尤其如何將最新科技引入操練馬匹。

「競駿皇者」初出1000米需留意

初步觀察游廄有一匹要𥄫住，亦是第一隻推介的「競駿皇者」，3歲由競駿會擁有，專業養馬團體，夠正氣。此馬在愛爾蘭跑3次，皆1200米直路，勇奪一冠兩亞，顯示鬥心極強，唔輸得之輩，在港初出1000米已即可跟進。

「尋寶勇士」5歲仍有上升空間

上季方嘉栢成績只算平穩，長期爆倉，不過真正突出分子不多，我睇中兩匹。第二隻推介的是「尋寶勇士」，新西蘭馬，3歲來港時，不知競賽為何物，之後更因傷腳，長唞近一季。馬房唔急，畀佢十足十康復時間，上季尾再上陣，立即脫胎換骨，出3場，一W兩P。睇走勢，今季轉5歲，馬只跑過7次，仍有大量空間上升，投資上佳對象！

「共享富裕」用何澤堯更放心

第三隻推介的是「共享富裕」，屬方廄另一寶藏，今年初才開始訓練，短短3個月已可上陣，毫無作賽經驗，出兩次皆跑第四不簡單。最令人注目的為其天生膽識及旺盛鬥心，展露在凡見空位就飆上，以及尾段衝刺特別凌厲。今季「共享富裕」早早出操，明顯開季就會郁手。故此也是可以一出就以投資心態捧場，1200米、1400米甚至1600米皆是其射程範圍，若用何澤堯就更可放心。

資深傳媒人 曾智華