黃子華自揭人生最大遺憾事：辜負黃霑 罕談64歲不婚單身之謎 丨獨家
2024-11-07 07:00 
相隔32年，集結香港兩大笑匠黃子華、許冠文在新片《破．地獄》中再次合作，齊齊演繹一個關於生死的嚴肅故事，傳達人生就是一場相遇和離別，反而要用有限的時間去珍惜身邊人及當下的訊息，子華神坦言拍完後也受到感染，還向《頭條日報》自揭兩件收埋在「夾萬」的心事。另外，向來少談私事的黃子華用神級妙語解釋64歲不婚之謎！採訪：方騫平、攝影：羅安強 化妝：翁嘉齊(黃子華)、MW(衛詩雅)、SINCERE FUNG@Wi11Wong(朱栢康)、髮型：@Helen@mobius_hk(黃子華)、Daniel Chou(衛詩雅)、HinWan @ M.i Salon(朱栢康)、造型：Sandro(衛詩雅)
11月9日上映的《破·地獄》聚焦香港獨有的殯葬文化，除咗深入殯儀館、東華三院義莊取景之外，黃子華更於深夜勇闖殮房通道拍攝，會有先人化妝及執骨等鏡頭。
約老死不相往來朋友食飯
黃子華、衛詩雅及朱栢康拍罷後，以自身角色探究生死，各自都有所反思，子華坦言：「釋懷及珍惜好重要，某程度上要明白對方處境，有啲嘢佢都未必想咁做，所以套戲真係好勁，就係因為呢套戲嘅人物及劇情，對我有啟發，甚至破咗我嘅『地獄』。」原來最近他相約一位心目中認定，這世都不會一齊食飯的身邊人食了餐飯：「對方係有份量嘅人，曾對佢好不滿，但連佢自己都唔知。」至於衛詩雅以前對靈車、靈堂、紙紥公仔都會有所忌諱，拍完此片後，她認為只要了解到它們背後的意思就不會有所懼；朱栢康反而會思考做人大道理，究竟是要迎合別人定做回自己？
不懂把握機會向霑叔學習
提到人生遺憾，黃子華形容如同呼吸空氣一樣是必有的元素，自爆人生最大遺憾發生在20幾年前：「當年未紅，霑叔(黃霑)經已搵我寫劇本，佢請我去富豪飯堂食飯，飯後帶我去佢屋企詳談，唉！當時我荷爾蒙失調，唔知黐咗邊條筋由個腦直插落膀胱，竟然推咗話『我唔識得寫人哋嘅劇本』，好後悔唔懂得把握機會向天才前輩，一代宗師偷師，所以𠵱家有機會跟許冠文合作，我就好似比特犬咁咬住唔放。」子華指許冠文係佢最大嘅偶像，心目中和李小龍齊名：「同佢合作唔係叫火花，係接到啲甘霖。」怎知打後他自編自導自演嘅電影《一蚊雞保鏢》破香港票房新低；而《乜代宗師》就將一生人的電影收入一鋪清袋，笑言輸了間劏房要「7街瞓」：「但唔好睇少我，我仲有個劏廁所…自己唔創作唔重要，最緊要同許冠文合作，大家拭目以待，如果票房有30億嘅話，每個演員生夠3.5個嚟謝票！」
冇兒冇女對結婚未有睇法
另外，問到單身的黃子華可有聯想到將來喪禮？子華笑住大讚記者問得好：「又幾好喎！提醒我有呢一日，嗰日一定會嚟...」他表示曾去過印度恆河睇燒屍及天葬的地方：「我唔介意用蓆捲起我，然後搵個唔犯法嘅地方『質』埋我，我覺得破地獄屬於世界上3大儀式之一，所以好榮幸拍到呢個戲...」語畢，他搞笑道：「係呢，點解我成日都可以為部戲做宣傳嘅！」對於角色講他50幾歲人，對結婚生仔有猶疑，追問究竟是否黃子華的心聲？對此，子華笑住推說：「係導演心聲，我冇兒冇女冇睇法。」他還用「子華神功」耍太極拆解不婚單身之謎：「我哋睇下喺地球邊派，有生仔派、唔生派，我又唔係姓何，冇呢啲咁嘅身家，點可以有呢啲嘢(生仔)？如果未來有多啲工作及機會就可以諗下囉，冇就唔敢諗，但太忙又唔得喎...所以話呢套戲幾豐富呀，咩話題都傾到喎，故冇得選擇推戲。」對於冇後人的他，如何處理將來的遺產呢？他大笑說：「可能導演話我冇遺產呢。」
最新回應