美股大升市玩多一個月？英偉達不升牛三不死｜晉佳

2024-12-17 17:43

周一美股冇大消息之下，升市成交顯著增加，動力非常充足。12月已踏入下半月，年底前嘅重要消息只剩下聯儲局議息，如無意外美股大牛市至少玩多一個月。

觀乎目前利率期貨顯示，97%機會美國12月減息、有80%機會1月份按兵不動，已符合聯儲局主席鮑威爾之前發放偏鷹立場，12月減完息過後，明年開始研究幾時達到中性利率，聯儲局毋須提早採取更鷹立場，有條件持續觀察。預料聯儲局議息唔會帶來震驚市場嘅訊息，餘下時間再冇重大消息，美股升浪較大機會順勢持續。

至於點解玩多一個月？目前納斯達克100指數NDX嘅14天RSI為70.59，未到嚴重超買水平。美股中線升浪見頂時，多數會伴隨RSI頂背馳。粗略推斷，NDX升勢持續多一個月嘅話，就會形成14天RSI雙頂背馳，會係首個嚴重超買訊號，到時大家就要留神。

短期考慮AI、量子電腦等當炒股

年尾再冇重大消息、主要指數亦未嚴重超買，加上成交逐步推升，估計短期買入美股嘅命中率亦會增加，加上股王英偉達（NVIDIA）仍然逆市受壓，同樣係市場未夠超買嘅現象，稍後數周繼續係美股市場爭取回報嘅時段，AI、量子電腦等等當炒概念股，或者高沽空股份，都係短期可考慮投機對象。

Mag7股份會繼續向好，至於Tesla（TSLA）升到幾時？同樣亦要視乎英偉達何時築底反彈，兩股一強一弱正走向極端，要留意幾時係強弱切換嘅時機，屆時反映買NVDA更勝TSLA。

關鍵字